Shyǵys Qazaqstannyń Abai aýdanyna qarasty Sarjal aýylynda ańshylar itpen qasqyrdyń shatysynan týǵan býdan - «qara qasqyrdyń» úiirin atyp aldy, dep habarlaidy QazAqparat tilshisi.
Áýeli aýyl mańyn qara qasqyr úiiri torýyldap júrgeni týraly aqparat taraǵan. Ondai áńgimeniń týyndaýyna Tailan qystaǵynda otyrǵan birneshe úidiń maly kúnde shyǵynǵa ushyraýy sebep bolǵan. Túz taǵylary tipti aýladaǵy azyn-aýlaq qaz ben taýyqqa da aýyz sala bastaǵan. Alǵashynda qystaq turǵyndary muny óz itterinen kórip, birnesheýin atyp ta kóredi. Keiin «baýkespeler» «qylmys ústinde» kózge túsedi. Qara qasqyrdy tek kinodan ǵana kóretin qystaq turǵyndary taǵylarǵa qarsy eshqandai áreket jasai almaǵan. Alǵashqy aiaz túskende qara qasqyrlar odan beter qutyryp, shopannyń kózinshe qoiǵa shapqan. Aqyry malshylar Sarjaldaǵy Sálim Ákimbaev bastaǵan ańshylardan kómek suraidy.
«Eldiń qara qasqyr dep júrgeni it pen kókbóriniń shatysynan týǵan býdan bolyp shyqty. Qasqyr bir ret mal alǵan jerine ailap shappaidy. Al bular kún saiyn qyrǵyn salǵan. Dáýren Maiqanov, Azamat jáne Janpeiis Ybyraev siiaqty turǵyndardyń birneshe bas qoiyn tamaqtap, siyryn tartyp ketken eken. Adamnyń kózinshe malǵa shabý da sirek kezdesetin jaǵdai. Ańshylyq tájiribemde birinshi ret býdan atyp turmyn» - deidi Sálim Ákimbaev.
Ańshylar býdan úiirden 5 qasqyrdy oqqa bailap úlgeripti. Tek bireýi ǵana aman qutylǵan.
«Qystaq malshylary kómek suraǵan soń. Óz kóligimizben shyǵyp, úiirdiń izine tústik. Birinshi kúni tek bireýin ǵana attyq. Qalǵandary qaraǵannyń arasyna tasalap, atqyzbady. Ekinshi kún oljaly bolyp, 4 qasqyr aldyq. Malshylar da riza. Aiaz túspei jatyp bulaisha erkinsigen qasqyrlar endi keshiksek, budan kóp shyǵyn keltirýi múmkin ǵoi» - deidi ańshy.
Oblys boiynsha qasqyr atýǵa berilgen limit ýaqyty 31 jeltoqsanǵa deiin jalǵasady.
«Biyl Shyǵys Qazaqstan boiynsha 415 qasqyrǵa limit bar. Bir adam 3 qasqyr ata alady. Odan assa, zańbuzýshylyq dep sanalady» - deidi oblystyq orman jáne janýarlar dúniesin qorǵaý jónindegi basqarma mamany Samat Didahmatov.
