Qazaqstan Respýblikasy Premer-Ministriniń orynbasary Gúlshara Ábdiqalyqova jumys saparymen Shyǵys Qazaqstan oblysyna keldi, dep habarlaidy QazAqparat.
Vitse-premer áýeli Semei qalasynyń Qazaq innovatsiialyq gýmanitarlyq-zań ýniversitetinde «Abai álemi» keń kólemdi kitap kórmesiniń jumysymen tanysty. Oblys ákimi Danial Ahmetov bul jobanyń «Rýhani jańǵyrý» baǵdarlamasy aiasynda júzege asyp jatqanyn aitty.
«Abai álemi» kitaptar toptamasy - «Rýhani jańǵyrý» ulttyq baǵdarlamasy aiasynda Qazaqstanannyń mádenieti men ádebietiniń damýyna yqpal etýge, Shyǵystan shyqqan uly tulǵalar men aqyn-jazýshylardyń týyndylaryn qaita jańǵyrtyp shyǵarýǵa, kórkem ádebiet arqyly jastardy otansúigishtikke tárbieleýge baǵyttalǵan bes jyldyq ádebi joba. 2018 jyly joba aiasynda jergilikti avtorlardyń 16 kitaby jaryqqa shyǵyp, oblys kitaphanalaryna taratyldy», - dedi D.Ahmetov.
Ákimniń aitýynsha, basylymnyń basty ereksheligi - kitapqa alǵysóz retinde abaitanýdyń bastaýynda turǵan Kákitai Ysqaquly, Ahmet Baitursynuly, Muhtar Áýezov maqalalarynyń tuńǵysh ret birge jariialanýynda.
Shákárimniń 160 jyldyǵy qarsańynda shyǵarmalary 2 tom bolyp baspa kórip, aqynnyń 1911-1912 jyldary Semei, Orynbor qalalarynda tóte jazýmen jaryq kórgen kitaptary, XX ǵasyrdyń basynda merzimdi basylymdarda jaryq kórgen aýdarmalary berilgen.
«Abai joly» roman-epopeiasyn orys tiline aýdarǵan reseilik jazýshy, aýdarmashy Anatolii Kimniń aýdarma nusqasy jaryqqa shyǵarylǵan.
«Bul shyǵarmalarǵa alǵysóz retinde jazýshynyń uly Murat Áýezov pen nemeresi Diiar Qonaevtyń maqalalary endi. Abai, Muhtar, Shákárim shyǵarmalaryn joǵary baǵalaǵan, Qazaqstannyń tuńǵysh halyq aqyny - Tóleý Kóbdikov. Aqynnyń shyǵarmalary buryn baspa kórmegen týyndylarymen tolyqtyrylyp, birinshi ret tolyq túrde jariialandy», - dedi aimaq basshysy.
Ádebi joba aiasynda tuńǵysh ret Fedor Dostoevskiidiń Semeide turǵan jyldary jazǵan shyǵarmalary jariialanypty. Eýropany tamsantqan Ámire Qashaýbaev jaily estelikter jinaǵy «Ánshi Ámire» ataýymen qazaq jáne orys tilderinde bir kitapqa toptastyrylyp baspa kórdi. Kitapqa ánshi jaily eń úzdik maqalalar men Jarqyn Shákárimniń 2016 jyly orys tilinde shyǵarǵan «Amre v Parije» kitaby tolyqtai enip otyr.
Shyǵys óńirinen shyqqan balalar jazýshysy, balalar kitaby boiynsha H.K. Andersen atyndaǵy Qurmet diplomynyń iegeri Marat Qabanbaevtyń balalarǵa arnalǵan «Chetyre vremeni rodnoi zemli» atty prozalyq shyǵarmalary alǵash ret orys tilinde shyǵys óńirinde jaryq kórip, jasóspirimderge usynyldy.
«Abai álemi» jobasy aiasynda jaryq kóretin avtorlardyń kitaptary aldaǵy jyly da basylyp shyǵa beredi. Biylǵy jyl Jastar jyly bolyp jariialanǵandyqtan, shyǵys óńiriniń jas talanttarynyń shyǵarmalary da jaryq kórmek.
