Ońtústik óńirlerinen keiin Shyǵys Qazaqstan oblysynyń sharýalary egis naýqanyna kiristi, dep habarlaidy "Ult aqparat" QR AShM baspasóz qyzmetine silteme jasap.
Biyl ShQO-da 1,3 mln gektar jerge egis egiledi, bul ótken jylmen salystyrǵanda 6,8 myń gektarǵa artyq.
«Jazdyq egis kólemi 1 mln 98 myń gektarǵa jetedi. Óńirde negizi dándi, dándi-burshaqty daqyldardy – 559,3 myń (jalpy alańnyń 41%) jáne maily daqyldar 481 myń gektarǵa (35,1%) egiledi. Maily daqyldardyń úlesinde dástúrli kúnbaǵys basym, onyń kólemi – 445 myń gektardan asady. Budan basqa, egis alqabynyń 292 myń gektaryna jem-shóp egiledi. Sondai-aq, 19 myń gektarǵa kartop, 16 myń gektarǵa kókónis pen baqsha salynady. Bul ShQO-daǵy barlyq egis alqabynyń 2,5%», delingen habarlamada.
Kóktemgi egis jumysyna 16,6 myń traktor, 5 myńnan astam júk kóligi, 93 egis kesheni, 11 myńnan astam tuqym sepkish, soqa men kýltivator jumyldyrylady. Traktorlardyń 98%, qalǵan tehnika 100% ázir.
«Kóktemgi egis jumysyna 2,5 myńnan astam iri jáne orta sharýashylyq jumyldyrylǵan. Egis jumystaryn júrgizý úshin Pavlodar MHZ-dan 30 myń tonna dizel otyny bólindi. Naýryz aiyna 8 myń tonna, sáýir aiyna 9 myń tonna, mamyr aiyna 8 myń tonna, maýsym aiyna 5 myń tonna belgilendi. Qala men aýdan ákimdikterimen olardy jetkizý jónindegi operatorlar anyqtaldy.
Biyl oblystyq biýdjetten sýbsidiia túrinde 5,4 mlrd teńge bólindi. Onyń ishinde tuqym sharýashylyǵyn qoldaýǵa – 2,7 mlrd teńge, mineraldy tyńaitqyshtardyń qunyn arzandatýǵa – 1,7 mlrd teńge, pestitsidterdi arzandatýǵa – 1,4 mlrd teńge qarastyrylǵan», delingen habarlamada.
Sonymen qatar, «Agrarlyq nesie korporatsiiasy» AQ arqyly egis naýqanyn qosymsha qarjylandyrý úshin fermerlerge 2,4 mlrd teńgeden astam tómen paiyzdy nesie berilgen.
Qazirgi ýaqytta Shyǵys Qazaqstan oblysynda egis alqaptaryn óńdeý jáne ylǵaldy jabý jumystary júrgizilip jatyr. Úrjar, Zaisan jáne Tarbaǵatai aýdandarynda qazirdiń ózinde dándi daqyldar egildi.
