Osy jyldyń naýryz-sáýir aiynda elimizde 4 millionnan astam adam jumyssyz qaldy. Bul týraly Úkimet otyrysynda QR Eńbek jáne halyqty áleýmettik qorǵaý ministri Birjan Nurymbetov aitty, - dep habarlaidy "Ult aqparat".
«Koronavirýs indetine bailanysty jariialanǵan tótenshe jaǵdaiǵa bailanysty eńbek naryǵyndaǵy ahýal kúrdeli boldy. Naýryz-sáýir ailarynda boljam boiynsha tabyssyz, jumyssyz qalǵan azamattar sany 4 millionnan astam boldy. 20 sáýirden bastap karantin sharalarynyń jeńildetilýine bailanysty bul kórsetkish mamyr aiynda 1 mln adamǵa deiin tómendedi dep boljap otyrmyz. Úkimet tarapynan ekonomikany jańǵyrtý, biznesti qoldaý, onyń ishinde jumyspen qamtý múmkindikterin keńinen kózdeý nátijesinde shilde aiynan bastap eńbek naryǵyndaǵy jaǵdaidyń turaqtanýyna qol jetkizý múmkin dep sanaimyz», – dedi Birjan Nurymbetov.
Ministrdiń aitýynsha, jyl sońynda jumyssyzdyqtyń boljamdy deńgeii 6,1 paiyzdy quraýy yqtimal.
«Jalpy biyl 1 mln 220 myń adamdy jumyspen qamtý sharalaryna tartýǵa tolyq múmkindigimiz bar. Oǵan ekonomikany, biznesti qoldaý sharalarynyń barynsha jumys oryndaryn saqtap qalý múmkindigi jáne barlyq memlekettik baǵdarlamalar aiasynda jańa jumys oryndaryn qurý áleýeti tolyǵymen paidalanylatyn bolady. Onyń ishinde jańa Jumyspen qamtýdyń jol kartasy aiasynda 255 myń jumys orny qurylmaq. Búginde jol kartasyna kirgen 6,5 myń jobanyń 5 300 jobasy bastalyp, 103 myń jumys ornyna 91 myń adam tartyldy. Onyń 35 paiyzy – jastar», – dedi Birjan Nurymbetov.
