Ulttyq bank tóraǵasynyń orynbasary Áliia Moldabekova biyl shilde aiyndaǵy teńge baǵamy jaiynda túsinik berdi, dep habarlaidy QazAqparat.
«Munai naryǵyndaǵy ahýal álemdik valiýta naryǵyndaǵy ahýal siiaqty shildede ekiushty jáne qubylmaly boldy. OPEK+ elderiniń ýaǵdalastyqtary týraly jáne koronavirýstyń delta shtamynyń taralý qarqyny týraly jańalyqtar aiasynda munai baǵasy birese kóterilip, birese tómendep otyrdy. Aidyń qorytyndysy boiynsha munai bir barrel úshin 76,33 AQSh dollaryna deiin 1,6%-ǵa ósti», - dedi Áliia Moldabekova.
Onyń aitýynsha, shildede teńge baǵamy munai baǵasynyń ósýi jáne Aqsha-kredit saiasaty jónindegi komitettiń bazalyq mólsherlemeni +/- 1,00 p.t. paiyzdyq dálizimen jyldyq 9,25% deńgeiine deiin 0,25%-ǵa kóterý týraly qabyldaǵan sheshimi aiasynda 424,45 teńgege deiin 0,7%-ǵa qalypty túrde nyǵaidy. Mólsherlemeniń kóterilýi ishki valiýta naryǵynda teńgerimdi ustap turýǵa ári syrtqy investorlar úshin teńgelik aktivterdiń tartymdylyǵyn saqtaýǵa yqpal etetin qosymsha faktor bolyp sanalady.
«Shildede valiýta birjasynda teńge-dollar jubymen saýda-sattyq kóleminiń maýsymdaǵy 3,16 mlrd AQSh dollarymen salystyrǵanda 3,09 mlrd AQSh dollaryna deiin birshama tómendeýine qaramastan, saýda-sattyqtyń ortasha kúndik kólemi biylǵy jyldyń basynan bastap ortasha deńgeiden edáýir joǵary: qańtar-maýsym aralyǵyndaǵy kezeńde 129 mln AQSh dollarymen salystyrǵanda 155 mln AQSh dollary deńgeiinde saqtalýda. Bul shetel valiýtasyna jetkilikti joǵary suranystyń saqtalýyn kórsetedi. Aldyńǵy suhbattarda atap ótkenimdei, shetel valiýtasyna suranys ekonomikalyq belsendiliktiń turaqty qalpyna kelýine jáne importtyń, eń aldymen, tutynýshylyq taýarlardyń ósýine bailanysty. Máselen, biylǵy birinshi jartyjyldyqta taýarlar importy 9,2%-ǵa ósip, 17,5 mlrd AQSh dollaryna jetti. Tutynýshylyq taýarlar importy 27%-ǵa nemese
1,2 mlrd AQSh dollaryna, onyń ishinde azyq-túlikke jatpaityn taýarlar importy 36%-ǵa nemese 1,1 mlrd AQSh dollaryna ósti», - dedi UB ókili.
Budan basqa, jazǵy kanikýl men demalys maýsymyna bailanysty jeke tulǵalar tarapynan maýsymdyq suranys faktory baiqalady. Sońǵy qoljetimdi derekterge sáikes, aiyrbastaý pýnktterinde qolma-qol shetel valiýtasyn satyp alý mamyrdaǵy 368 mln AQSh dollarynan maýsymda
555 mln AQSh dollaryna deiin ósti.
Degenmen, valiýta naryǵynda teńgerimsizdik baiqalǵan joq. Ulttyq bank valiýtalyq interventsiialardy júzege asyrmady. Biýdjetke transfertterdi júzege asyrý úshin Ulttyq qor qarajatyn konvertatsiialaý kólemi 1,1 mlrd AQSh dollaryn, al kvazimemlekettik sektor tarapynan valiýtany satý 479 mln AQSh dollaryn qurady.
«Sheteldik investorlardyń Qazaqstannyń MBQ-daǵy portfeldik investitsiialarynyń kólemi shildede 791 mlrd teńgeden 822 mlrd teńgege deiin ósti, bul beirezidentterdiń teńgedegi aktivterge qyzyǵýshylyǵynyń saqtalǵanyn kórsetedi. Tamyzdyń basynan bastap delta shtamnyń taralýy men munai baǵasynyń tómendeýi aiasynda teńge bir dollar úshin 425,53 teńge deńgeiine deiin 0,3%-ǵa álsiredi», - dedi Áliia Moldabekova.
