Dúniejúzi qazaqtarynyń qaýymdastyǵy, «Otandastar qory» KEAQ jáne «Qazaqkontsert» uiymy birlesip, «Uly dala elinen» atty qazaqstandyq ártisterdiń kontsertin uiymdastyrady, dep habarlaidy "Ult aqparat".
QR Aqparat jáne qoǵamdyq damý ministrliginiń tapsyrmasymen júzege asyrylatyn kontserttiń maqsaty – mýzykalyq óner arqyly ulttyq biregeilikti saqtaý, qazaq diasporasyna rýhani qoldaý kórsetý, sheteldegi qandastarmen bailanysty nyǵaitý.
«Osy igi joba aiasynda 22 tamyz kúni saǵat 21.00-de (Nur-Sultan ýaqyty boiynsha) álemge áigili «TURAN» etnofolklorlyq ansambliniń onlain kontserti ótedi. Ansambl qazaq halqynyń ulttyq mýzykalyq murasyn jańǵyrtyp, umyt bola bastaǵan tól aspaptardyń súiemeldeýimen ózderiniń úzdik týyndylaryn oryndaidy», - delingen «Qazaqkontsert» uiymynyń baspasóz qyzmeti taratqan aqparatta.
«TURAN» ansambli ulttyq mýzykalyq aspaptardyń dybysyn qazirgi zamanǵa sai laiyqtap, jańa formatta usynyp júr. On jyldyq tarihy bar óner ujymy qazaq mýzykasyn álemge áigilep, 70-ten astam shet memlekette 600-den astam jeke kontsert bergen. Ansambldiń quramynda Serik Nurmoldaev, Maqsat Medeýbek, Baýyrjan Bekmuhanbetov, Erjigit Áliev, Jantý Dadabaev syndy talantty mýlti instrýmentalist mýzykanttar bar. Qazaq halqynyń otyzdan astam ulttyq mýzykalyq aspaby bolsa, mýzykanttardyń árqaisysy solardyń birnesheýinde oinaýdy meńgergen.
Onlain kontsert «Otandastar qory» KEAQ Otandastar channel YouTube arnasynyń tikelei efirinde kórsetilip, barshaǵa qoljetimdi bolady.
