Densaýlyq saqtaý vitse-ministri Aleksei Tsoi Parlament Májilisinde ótken úkimet saǵatynda elimizde meditsina týrizmin damytý týraly baiandady. Onyń aitýynsha jetekshi elderdiń azamattary Qazaqstandaǵy EKO qyzmetine jii júginedi, dep habarlaidy Baq.kz tilshisi.
Májilis depýtaty Quralai Qaraken Densaýlyq saqtaý vitse-ministri Aleksei Tsoiǵa meditsinalyq týrizmdi damytý tóńireginde saýalyn qoidy.
«Qurmetti, Aleksei Vladimirovich. Sońǵy kezde meditsinalyq týrizm kóbirek tanymal bolyp keledi. Osy týrizm baǵyty jaqsy damýda jáne osy salada álem boiynsha 15 mlrd dollarǵa jýyq qarajat ainalymda. Bizdiń azamattarymyz shetelge baryp emdeledi jáne sol úshin kóp aqsha jumsaidy. Alaida tek Astanada ǵana birneshe álemdik deńgeidegi meditsinalyq ortalyqtar bar. Osyǵan bailanysty Qazaqstandaǵy meditsinalyq týrizmdi damytý úshin qandai júieli sharalar bar. Álemdik tanymal meditsinalyq ortalyqtar ne úshin bizdiń densaýlyq saqtaý júiesine investitsiia salýǵa asyqpaidy. Bul nege bailanysty?», - dep surady ol.
Vitse-ministr álemde meditsinalyq týrizm qarqyndy damyp jatqanyn, bul tendentsiia Qazaqstanda da baiqalatynyn atap ótti.
«Meditsina týrizmin yntalandyryp, azamattarymyzdyń shetelge aǵynyn azaitý úshin eń birinshi kezekte elimizdiń infraqurylymyn esepke alýymyz kerek. Ekinshiden, qurylys salýǵa sheteldik investorlardy tartýǵa jumys júrgizilip jatyr. Bile bilseńizder, álemde meditsinalyq týristerdiń negizgi donory AQSh bolyp otyr. Barlyq el azamattary shetelge baryp emdelgisi keledi. Biz azamattarymyzdyń óz elimizde sapaly qyzmet alǵanyn qalaimyz», - dedi ol.
Onyń aitýynsha, qazir Qazaqstanda GCI halyqaralyq akkreditatsiiasyn alǵan 7 uiym bar. Bul akkreditatsiiany barlyq sheteldik kompaniialar, ásirese saqtandyrý kompaniialary rastaidy. Sebebi bul emhanalarda emdelý qaýipsiz jáne álemdik standarttarǵa sáikes keled. Mundai sheteldik saqtandyrýlar sheteldikterdiń osy emhanalarǵa kelýi men tolyq emdelýin qamtamasyz etedi.
«Byltyr elimizge kelýshiler sany artqanyn baiqaimyz. 1680 shetel azamaty aqyly stantsionarly em alǵan. 23 myń shetel azamaty saýyqtyrý qyzmetin, sonyń ishinde sanatoriia-kýrorttyq em alǵan. Bul jerde úlken potentsial bar. Bizde bári bile bermeitin bir baǵyt bar, ol – ekstrakorporaldy uryqtandyrý men reprodýktivti meditsina. Muny sheteldikter jaqsy biledi jáne álemniń jetekshi elderinen elimizge kóp keledi. Sebebi mundai tehnologiialar bizde jaqsy damyǵan. Iaǵni, biz meditsina týrizmin damytýdy neden bastaitynymyzdy anyqtadyq», - dep sózin túiindedi Tsoi.
