Sheteldik tanymal mýltfilm arnalary qazaqshalanýy múmkin. Bul týraly QR Aqparat jáne qoǵamdyq damý vitse-ministri Bolat Tilepov aitty, dep habarlaidy QazAqparat.
«Al, endi til máselesi - bul rýhaniiattyń ózegi. Bul rette de qazirgi tańda Aqparat jáne qoǵamdyq damý ministriniń tapsyrmasymen qarastyrylyp jatqan bastamalar bar. Máselen - elimizdiń kabeldik operatorlary arqyly taraityn sheteldik telearnalardy qazaq tiline aýdarý. Árine, kez kelgen eldiń erteńi - bala tilinde. Sondyqtan bul jumysty sheteldik tanymal mýltfilm arnalarynan bastaý kerek degen usynys bar. Sóz joq, bul bastamalar áli qoǵamdyq talqylaýdan ótip, tiisti mamandardyń, sarapshylardyń, ziialy qaýymnyń, ata-analardyń qoldaýymen bolatyn dúnieler», - dedi vitse-ministr Ortalyq kommýnikatsiialar qyzmetindegi baspasóz máslihatynda.
Vitse-ministrdiń aitýynsha, Aqparat jáne qoǵamdyq damý ministrligi úshin eń birinshi mindet - bul «Rýhani jańǵyrý» baǵdarlamasynyń tiimdiligi.
«Bul baǵytta ministrliktiń barlyq múmkindigi jáne eń bastysy, tolyq túsinigi bar. Rýhaniiat máselesi bul - jalǵyz memlekettiki emes, ortaq másele. Sondyqtan da oǵan qoljetkizý úshin bir ǵana memlekettiń jumysy az. Árbir azamat atsalysýy kerek dep oilaimyz. Sonda ǵana «Rýhani jańǵyrý» baǵdarlamasyn iske asyrýda jańa serpin kóretin bolamyz»,- dedi Bolat Tilepov.
