Sheteldik balalar telearnalarynyń Qazaqstan aýmaǵyndaǵy efirin tolyǵymen memlekettik tilde kóshirý máselesi pysyqtalýda. Bul jaiynda Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy QazAqparat.
«Balalardy memlekettik tilde sóileýge yntalandyrý úshin qazirgi ýaqytta qazaq tilinde mýltfilmder men tele baǵdarlamalardy óndirýge erekshe kóńil bólinýde. Bul baǵytta «Balapan» telearnasy belsendi jumystar atqarýda. Búginde telearna 8 jasqa deiingi kórermender úshin tolyǵymen memlekettik tilde habar taratady. Onyń efiriniń 80 paiyzyn animatsiialyq ónimder quraidy. Aýdiiatoriianyń talǵamyna sai «Balapan» arnasy 2010 jyldan beri 64 000 saǵat kóleminde 246 teleónim ázirledi, onyń ishinde jalpy hronometrajy 15 myń minýtty quraityn 80 animatsiialyq joba bar. Aýditoriiany ulǵaitý maqsatynda atalǵan ónimder telearnanyń Youtube arnasynda ornalastyrylady», delingen Eraly Toǵjanovtyń jaýabynda.
Onyń atap ótýinshe, 2020 jyldan bastap telearna úzdik sheteldik týyndylardyń internet quqyqtaryn satyp alý jumysyn júrgizip otyr. Nátijesinde 7 sheteldik kompaniiamen kelisimshart jasalyp, memlekettik tilge aýdarylǵan sheteldik mýltfilmderdiń 700 seriiasy «Balapan»-nyń Youtube kanalyna júkteldi. Bul bastama óz jalǵasyn tabady.
«Reseilik «Mýlt» telearnasymen jasaǵan kelisimge sáikes 2019 jylǵy sáýirden bastap atalǵan telearna Qazaqstan aýmaǵyndaǵy efiriniń bir bóligin memlekettik tilge kóshirdi. Nátijesinde reseilik telearnanyń «Teksheler», «Qonjyqtar», «Siqyrly sham» jáne basqa da mýlfilmderi qazaq tilinde kórsetiledi. Qazirgi ýaqytta «Nickelodeon», «Tiji», «Mýlt» jáne «Karýsel» siiaqty tanymal sheteldik balalar telearnalarynyń Qazaqstan aýmaǵyndaǵy efirin tolyǵymen memlekettik tilde kóshirý máselesi pysyqtalýda. Budan bólek, «Qazaq radiosynyń» jelisinde «Balalarǵa bazarlyq», «Balapan saz», «Tapqyr bala» balalarǵa arnalǵan baǵdarlamalar turaqty túrde jumys isteidi», - dedi vitse-premer.
