Úkimette kapitaldy shetelden elge qaitarý mehanizmin ázirleý boiynsha usynystar talqylandy, - dep habarlaidy "Ult aqparat" Premer-ministrdiń baspasóz qyzmetine silteme jasap.
Premer-ministr Álihan Smaiylov kapitaldy shetelden elge qaitarý jáne elimizden qarajat shyǵarylýyna qarsy is-qimyl jasaýǵa baǵyttalǵan sharalardy kúsheitý jóninde keńes ótkizdi.
"Premer-ministr ókimimen komissiia jáne onyń aiasynda bes jumys toby quryldy. Jumys toptary aqshalai qarajattyń jylystaýy boiynsha taldaý júrgizip, kapitaldy shetelden elge qaitarýdy yntalandyrý, shekteý sharalaryn engizý, shyǵarylǵan kapitaldy qaitarý sharalaryn qabyldaýǵa bailanysty tiisti usynystardy ázirleidi", - delingen habarlamada.
Qarjy ministrliginiń Memlekettik kirister komitetinde valiýtany baqylaýdyń keibir fýnktsiialary jóninde usynystar talqylandy. Yntalandyrý sharalarynyń biri - valiýta túsimniń 80 paiyzyna aiyrbas jasalǵan jaǵdaida, qaitarýǵa usynylǵan QQS somalaryn ońailatylǵan tártippen óteý.
Sondai-aq, rezident emes dividendterge tóleý kezinde salyq jeńildikterin joiý, rezident emes ózara bailanysty tulǵalar kórsetken materialdyq emes qyzmetter boiynsha shegerimderdi shekteýdi engizý siiaqty sharalar usynylady.
"Transferttik baǵa belgileý týraly" QR Zańyn jetildirýge baǵyttalǵan normalar ázirlendi. Odan bólek, kapitaldy elge qaitarýdy yntalandyrý, sondai-aq kapitaldy elden shyǵarýda salyqtyq ákimshilendirýdi kúsheitý boiynsha da sharalar pysyqtalyp jatyr. Komissiia jumysynyń qorytyndysy boiynsha usynystar Memleket basshysynyń atyna joldanatyny aityldy.
