Búgin Parlament Májilisiniń jalpy otyrysynda depýtat Dariǵa Nazarbaeva investitsiialyq saiasatty iske asyrý máselesi Úkimet basshysy Asqar Maminniń atyna saýal joldady, dep habarlaidy QazAqparat.
«Otandyq ekonomikanyń túiindi salalaryna investorlar tartý eldiń tabysty damýy úshin negiz bolyp sanalady. Pandemiia jáne onyń saldarynan týyndaǵan jahandyq ekonomikalyq retsessiia aiasynda memleketter arasynda investitsiialar tartý úshin básekelestik artyp keledi, eldiń investitsiialyq klimaty sheshýshi ról atqarady. Investitsiialyq ahýaldy jaqsartý úshin 2017 jyly 2018-2022 jyldarǵa arnalǵan Ulttyq investitsiialyq strategiia ázirlendi. Tutastai alǵanda, memleket investitsiialyq ahýaldy jetildirý jóninde birqatar keshendi sharalar qabyldaýda. Sonymen qatar, Qazaqstan Respýblikasy Syrtqy ister ministrliginiń aqparatyna sáikes, 2020 jyly elimizdiń ekonomikasyna tikelei sheteldik investitsiialar aǵyny 30 paiyzǵa tómendegen. Investitsiialyq ahýaldy jaqsartý máseleleri ózekti bolyp qala beredi», - dedi D. Nazarbaeva.
Osyǵan bailanysty depýtat tiisti suraqtarǵa jaýap berýdi surady.
«Strategiiany iske asyrýdyń aǵymdaǵy mártebesi qandai, 2018-2020 jyldardyń nátijeleri boiynsha negizgi nysanaly indikatorlarǵa qol jetkizildi me? Strategiia jańa investitsiialar tartý úshin eń tiimdi bolyp sanalatyn «perspektivaly salalardy» anyqtaidy, atap aitqanda AKT, týrizm jáne qarjy. Eldiń osy salalardaǵy básekelestik pozitsiialary kúsheitildi me, strategiiany iske asyrý jyldarynda qandai negizgi investitsiialyq jobalarǵa bastamashylyq etildi? Osy esepti jyldary eldegi qazirgi investorlardy ustap qalý jáne qaita investitsiialaýdy yntalandyrý úshin qandai naqty sharalar qabyldandy? Strategiia tiimdi operatsiialyq sharalardy júzege asyrýdy jáne investitsiialardy tartýdyń jańa tásilderin engizýdi qarastyrady. Investitsiialyq jumysta qandai jańa tásilder qoldanylady, olardy tájiribege engizýdiń nátijesi qandai?», - dep surady Dariǵa Nazarbaeva.
«Strategiia investorlardyń shaǵymdary men máselelerin sáikestendirý júiesin qurýdy kózdedi. Bul júie iske qosyldy ma? Budan basqa, investitsiialyq jobalardyń monitoringtik júiesi engizildi me, eldegi investitsiialyq ahýaldyń jai-kúiine júieli túrde taldaý júrgizilip jatyr ma? Strategiia sheńberinde ony iske asyrý barysyn taldaýǵa negizdelgen «Qazaqstannyń investitsiialyq ahýalynyń jai-kúii týraly jyl saiynǵy baiandamany» jariialaý josparlanǵan bolatyn. Osy baiandama jariialandy ma? 2020 jyly qandai negizgi tujyrymdar jasaldy?», - dedi depýtat.
