Astananyń 20 jyldyǵyna jáne Qazaqstan Prezidentiniń týǵan kúnine orai shetel úkimetteri men memleketteri basshylary quttyqtaýlar joldaýda, dep habarlaidy Aqordanyń baspasóz qyzmeti.
Resei Federatsiiasynyń Prezidenti Vladimir Pýtin óziniń quttyqtaý jedelhatynda Astana men Máskeý arasyndaǵy odaqtastyq pen strategiialyq seriktestiktiń odan ári nyǵaiyp, Qazaqstan men Reseidiń Eýraziialyq Ekonomikalyq odaq, Ujymdyq qaýipsizdik shart uiymy, Shanhai yntymaqtastyq uiymy, Táýelsiz Memleketter Dostastyǵy jáne basqa da halyqaralyq qurylymdar aiasyndaǵy ózara tabysty yqpaldastyǵy keńeie túsetinine senim bildirdi.
«Siz óz eńbegińizdiń arqasynda Qazaqstan halqynyń qurmetine bólenip, halyqaralyq deńgeide joǵary bedelge ie boldyńyz. Sizdiń eýraziialyq integratsiia jónindegi ideialaryńyz elderimizdiń áleýmettik-ekonomikalyq damýyna, Eýraziia qurlyǵyndaǵy turaqtylyq pen qaýipsizdikti qamtamasyz etýge septigin tigizip, dáiekti túrde júzege asyrylyp keledi.
Shyn júrekten Sizge zor densaýlyq, baq-bereke, amandyq jáne jańa jetistikter tileimin», - delingen jedelhatta.
***
Belarýs Respýblikasynyń Prezidenti Aleksandr Lýkashenko Nursultan Nazarbaevtyń eki el arasyndaǵy qarym-qatynastardy strategiialyq turǵyda nyǵaitýǵa qosqan jeke úlesin belarýs halqy joǵary baǵalaitynyn atap ótti.
«Sizdiń jasampaz jáne jan-jaqty qyzmetińiz Qazaqstandy qýatty ári táýelsiz elge ainaldyrdy, al syndarly ári kóregen syrtqy saiasatyńyz halyqaralyq arenada keń qoldaýǵa ie boldy.
Eki jaqty áriptestikti nyǵaitý bizdiń dostas halyqtarymyzdyń múddesine jáne ortaq eýraziialyq úiimizdi damytýǵa odan ári qyzmet ete beredi dep senemin», - delingen jedelhatta.
***
Túrikmenstan Prezidenti Gýrbangýly Berdimuhamedov óz hatynda Memleket basshysynyń Qazaqstan halqynyń igiligi jolyndaǵy barlyq bastamalarynyń tabysty júzege asyrylýyna tilektestik bildirdi.
«Sizdiń dana basshylyǵyńyzdyń arqasynda baýyrlas Qazaqstan Respýblikasy áleýmettik-ekonomikalyq damý jolynda zor jetistikterge jetip, halyqaralyq arenadaǵy bedelin dáiekti túrde nyǵaityp keledi.
Eki jaqty qatynastarymyzdyń joǵary deńgeii Túrikmenstan-Qazaqstan arasyndaǵy strategiialyq seriktestikti jáne memleketaralyq bailanystardy barlyq baǵyttar boiynsha odan ári keńeitý úshin berik negiz bolatynyna senimdimin», - delingen jedelhatta.
***
Armeniia Respýblikasynyń Prezidenti Armen Sarkisian óz jedelhatynda eki el arasynda qalyptasqan syndarly ózara is-qimyl Armeniia-Qazaqstan memleketaralyq yntymaqtastyǵynyń kún tártibin eleýli túrde tolyqtyra túsetinin atap ótti.
«Siz memleketti basqarý isindegi mol tájiribeńizdiń, Qazaqstan Respýblikasynyń múddesin tabandylyqpen qorǵai biletindigińizdiń jáne keń kólemdi halyqaralyq yntymaqtastyqty ilgeriletý mindetterin sheshe alatyndyǵyńyzdyń arqasynda halyqaralyq arenada zor qurmet pen barsha jurt moiyndaǵan bedelge ie boldyńyz.
Sizge zor densaýlyq, amandyq pen tolaiym tabys, al Qazaqstan halqyna beibit ómir men baq-bereke tileimin», - delingen jedelhatta.
***
Moldova Respýblikasynyń Prezidenti Igor Dodon Nursultan Nazarbaevty týǵan kúnimen quttyqtap, Eýraziialyq ekonomikalyq odaqty qurýǵa jáne qalyptastyrýǵa zor úles qosqanyn atap ótti.
«Siz ótken ǵasyrdyń 90-shy jyldarynyń ózinde elderimiz úshin qazirgi kúrdeli álemde egemendik pen táýelsizdikti saqtaýmen qatar óz ekonomikalyq áleýetin arttyrýdyń mańyzdy ekenin de túsinip, osy maqsatpen eriktilik pen teń quqyly ustanymǵa negizdelgen memleketaralyq birlestik qurýdy usyndyńyz. Sizdiń ideiańyz júzege asyp, Eýraziialyq ekonomikalyq odaq quryldy. Osy uiymda Moldova Respýblikasy baqylaýshy memleket mártebesin aldy», - delingen jedelhatta.
***
Ispaniia Koroli VI Felipe Astananyń 20 jyldyq mereitoiyna jáne Memleket basshysynyń týǵan kúnine orai quttyqtaý jedelhatyn joldady.
«Astana «EKSPO-2017» halyqaralyq kórmesiniń ashylý rásimine qatysý úshin Sizdiń elińizge saparmen barǵanda qonaqjailyq tanytyp, meni ystyq yqylaspen qarsy alǵanyńyz esimde.
Osy tamasha múmkindiktiń arqasynda men elordańyzdyń zamanaýi infraqurylymy bar ári jarqyn bolashaqqa umtylǵan iri qalaǵa ainalǵanyn kórdim», - delingen jedelhatta.
***
Polsha Respýblikasynyń Prezidenti Andjei Dýda Qazaqstan men Polsha arasyndaǵy dostyq qatynastar eki jaqty tabysty yntymaqtastyqtyń dáleli ekenin atap ótti.
«Qazaqstan Polshanyń Ortalyq Aziia óńirindegi mańyzdy áriptesteriniń biri sanalady.
Jahandyq problemalardy sheshý isine belsendi atsalysqanyńyz úshin Sizge zor qurmetpen qaraimyn. Qazaqstannyń Birikken Ulttar Uiymynyń Qaýipsizdik Keńesine tóraǵalyq etý kezindegi bastamalary, sonyń ishinde ózim qatysqan joǵary deńgeidegi jaryssózder - sonyń aiqyn dáleli. Siz qolǵa alyp jatqan igi ister óńirde jáne álemde beibitshilik pen qaýipsizdikti nyǵaitýǵa septigin tigizedi den senemin», - delingen jedelhatta.
***
Serbiia Respýblikasynyń Prezidenti Aleksandr Výchich barsha qazaqstandyqtardy Astananyń 20 jyldyǵymen quttyqtap, Memleket basshysyna jaýapty qyzmette tabysqa jete berýine tilektestik bildirdi.
«Qazaqstannyń qol jetkizgen jetistikterine tánti ekenimdi bildirgim keledi. Siz tiimdi basshylyǵyńyzdyń arqasynda «Tórtinshi ónerkásiptik revoliýtsiia jaǵdaiyndaǵy damýdyń jańa múmkindikteri», «Bes áleýmettik bastama», «Qazaqstan - 2050» strategiiasy» siiaqty bastamalar aiasynda kózdegen maqsattaryńyzdyń bárine qol jetkizesiz dep senemin.
Sizdiń kóregendigińiz ben jumysqa berilgendigińizdiń arqasynda Qazaqstan qaryshtap damyp, birte-birte álemde mańyzdy orynǵa ie bolyp kele jatyr», - delingen jedelhatta.
***
Bolgariia Respýblikasynyń Prezidenti Rýmen Radev eki jaqty negizdegi jáne Eýropa Odaǵy men Qazaqstan qarym-qatynastary aiasyndaǵy memleketaralyq dialogtyń damý barysyna kóńili tolatynyn aitty.
«Elderimiz ben halyqtarymyzdyń arasyndaǵy dostyq qarym-qatynastar bizdiń saiasi, ekonomikalyq jáne mádeni salalardaǵy yntymaqtastyǵymyzdyń nyǵaiýyna óz úlesin qosatynyna senimdimin», - delingen jedelhatta.
***
Grýziia Prezidenti Giorgii Margvelashvili Qazaqstan táýelsizdik alǵan sátten bergi, salystyrmaly túrde, az ýaqyt ishinde Nursultan Nazarbaevtyń basshylyǵynyń arqasynda qýatty, damyǵan, joǵary halyqaralyq bedel men senimge ie bolǵan memleketke ainalǵanyn atap ótti.
«Bul kúnderi 20 jyldyǵyn atap ótip jatqan Astana zamanaýi Qazaqstan damýynyń simvoly ekeni sózsiz.
Sizdiń Grýziia men Qazaqstan arasyndaǵy yntymaqtastyqty damytýǵa jáne nyǵaitýǵa ólsheýsiz úles qosqanyńyzdy erekshe atap ótkim keledi. Eki el arasyndaǵy dostyq pen ózara tiimdi qarym-qatynastar dástúri aldaǵy ýaqytta da nyǵaia beredi dep senemin», - delingen jedelhatta.
***
Resei Federatsiiasy Úkimetiniń tóraǵasy Dmitrii Medvedev óziniń quttyqtaý jedelhatynda Qazaqstan Prezidentiniń eki memleketti bailanystyratyn dostyq qarym-qatynastardy, tatý kórshilikti jáne odaqtastyqty nyǵaitýǵa qosqan jeke úlesin erekshe atap ótti.
«Saýda-ekonomikalyq jáne investitsiialyq yntymaqtastyq dáiekti túrde damyp keledi jáne energetika, ónerkásip, infraqurylym, joǵary tehnologiialar men basqa da salalardaǵy perspektivti birlesken jobalar júzege asyrylýda.
Úkimetterimiz arasyndaǵy belsendi áriptestikke negizdelgen jumystar tájiribe júzindegi kooperatsiiany odan ári arttyrýǵa jáne Eýraziialyq ekonomikalyq odaq aiasyndaǵy integratsiialyq is-qimyldarymyzdy tereńdetýge septigin tigizedi dep senemin», - delingen jedelhatta.
