Elbasy Nursultan Nazarbaevtyń atyna shetel memleketteri men úkimetteri basshylarynan kelip jatqan quttyqtaý hattar legi jalǵasýda, - dep habarlaidy QR Tuńǵysh Prezidentiniń resmi saity.
Qytai Halyq Respýblikasynyń Tóraǵasy Si Tszinpin óz jedelhatynda Qazaqstannyń Tuńǵysh Prezidentine myqty densaýlyq pen uzaq ǵumyr tilegen.
«Siz Qazaqstan Respýblikasynyń negizin qaladyńyz jáne óz halqyńyzdyń ystyq yqylasy men qurmetine bólengen ult kóshbasshysyz. Ózińizben birge Qytai-Qazaqstan qatynastarynyń igiligi jolynda iyq tiresip jumys istegen kezderdi jii eske alamyn. Eki el yntymaqtastyǵyn damytýǵa qosqan zor úlesińizdi joǵary baǵalaimyn. Siz árdaiym meniń jaqsy dosym bolyp qala beresiz. Ári qarai da Qytai men Qazaqstan arasyndaǵy dostyqty damytýǵa kóńil bólesiz dep senemin.
Sizge myqty densaýlyq, uzaq ǵumyr men barlyq bastamalaryńyzǵa tabys, al dostas Qazaqstan halqyna baq-bereke tileimin», - delingen Si Tszinpinniń jedelhatynda.
Ázerbaijan Prezidenti Ilham Áliev Elbasynyń basshylyǵymen Qazaqstan Respýblikasy damýdyń úlken jolynan ótkenin atap ótti.
«Sizdiń kóregen jáne tabandy saiasatyńyzdyń arqasynda ekonomika aitarlyqtai ilgeri basyp, halyqtyń áleýmettik ál-aýqaty ósti jáne Qazaqstannyń halyqaralyq arenadaǵy bedeli artty.
Qurmetti Nursultan Ábishuly, osynaý aitýly kúnde Sizdi taǵy da shyn júrekten quttyqtaimyn jáne baýyrlas Qazaqstan halqyna tatýlyq pen baq-bereke tileimin», - delingen jedelhatta.
Armeniia Respýblikasynyń Prezidenti Armen Sarkisian Elbasynyń álemdik deńgeidegi tulǵalyǵy men danalyǵyna árdaiym tamsanyp keletinin aitty.
«Osy aitýly kún – Sizdiń Qazaqstannyń qarqyndy damýyndaǵy, halyqaralyq arenadaǵy rólin nyǵaitýdaǵy zor jetistikterińizdi taǵy bir ret baǵalaýdyń múmkindigi», - delingen A.Sarkisiannyń jedelhatynda.
Sondai-aq Ýkraina Prezidenti Vladimir Zelenskii Elbasyn 80 jyldyq mereitoiymen quttyqtady.
«Sizdiń memlekettik qyzmetińiz tarihi kóregendiktiń, halyq múddesine degen adaldyqtyń, táýelsizdiktiń júieli qorǵalýynyń jáne Qazaqstan Respýblikasynyń belsendi damýynyń úlgisi.
Sizdiń memleketti basqarýdaǵy qajyrly eńbegińiz bizdiń elderimiz arasyndaǵy qarym-qatynastardyń tabysty damýynyń kepiline ainaldy jáne osy yntymaqtastyq budan bylai da oń qarqynyn saqtaidy dep senemin. Men Siz siiaqty ýkrain halqynyń Ortalyq Aziiadaǵy shynaiy dosy men senimdi seriktesi bar ekenin baǵalaimyn», - dep jazǵan V.Zelenskii.
Polsha Respýblikasynyń Prezidenti Andjei Dýda Elbasynyń memleketaralyq yntymaqtastyqty damytýdaǵy kúsh-jigerin atap ótti.
«Búgingi tańda Qazaqstansyz halyqaralyq qaýipsizdik arhitektýrasy týraly aitý qiyn. Qazaqstannyń BUU Qaýipsizdik Keńesine 2017-2018 jyldardaǵy alǵashqy turaqty emes músheligi kezinde kótergen bastamalary jáne osy alańdaǵy bizdiń birlesken jumysymyz sózime dálel», - delingen Polsha Prezidentiniń jedelhatynda.
Armeniia Respýblikasynyń Premer-Ministri Nikol Pashinian da Nursultan Nazarbaevqa jáne kúlli Qazaqstan halqyna tatýlyq pen baq-bereke tiledi.
«Qazaqstannyń damýyna jáne eýraziialyq keńistiktegi ózara tiimdi integratsiialyq úderisterdi kúsheitýge baǵyttalǵan Sizdiń kópjyldyq kúsh-jigerińizdiń arqasynda eleýli progreske qol jetkizildi», - dep jazdy N.Pashinian.
Sondai-aq Litva Respýblikasynyń Prezidenti Gitanas Naýseda, Latviia Respýblikasynyń Prezidenti Egils Levits, Iordaniia Koroli II Abdalla ibn Hýsein ál-Hashimi, Úndistannyń Premer-Ministri Narendra Modi jáne Liýksembýrg Premer-ministri Ksave Bettel ózderiniń quttyqtaý hattarynda Elbasynyń Qazaqstannyń táýelsizdigin qalyptastyrýdaǵy jáne halyqaralyq qatynastardy nyǵaitýdaǵy erekshe rólin atap ótti.
