Parlament Senatynyń jalpy otyrysynda «Qazaqstan Respýblikasy men Soltústik Makedoniia Respýblikasy arasyndaǵy sottalǵan adamdardy berý týraly shartty ratifikatsiialaý týraly» Zańy qabyldandy, dep habarlaidy QazAqparat.
Sharttyń basty maqsaty – basqa elderde sottalǵan azamattarymyzǵa jazasyn elimizde óteýge múmkindik jasaý. Shartqa sáikes sottalǵan adamdardy berý úshin: ol adam eki eldiń biriniń azamaty bolýy tiis, eki elde de qylmys bolyp sanalatyn áreket úshin sottalǵan bolýy qajet, suraý alynǵan kezde úkim zańdy kúshine engen bolýy tiis jáne keminde 6 ai óteitin ýaqyty qalýy tiis, sottalǵan adamnyń jazbasha kelisimi kerek», - dedi QR Bas prokýrorynyń birinshi orynbasary Berik Asylov.
Sottalǵan adam kelesi jaǵdailarda berilmeidi:
- eger qylmyskerdi berý el egemendigine nuqsan keltiretin bolsa, ulttyq zańnamaǵa qaishy kelse;
- adam memlekettik qaýipsizdikke qol suǵatyn qylmys úshin sottalǵan bolsa;
- sottalǵan adam talap qoiý rásimderine tartylǵan bolsa. Mysaly, onyń qylmysy arqyly kelgen shyǵyndy qaitarý jóninde sot protsesi júrip jatsa.
«Qazirgi kezde eki jaqta da berýge jatatyn sottalǵandar joq. Osyndai sharttar 21 elmen jasaldy (Ýkraina, Qytai, Túrkiia, Birikken Arab Ámirlikteri). Bolashaqta 6 elmen (Ózbekstan, Kipr, Portýgaliia, Perý jáne Dominikan Respýblikasy) qol qoiýdy qarastyryp jatyrmyz. Búgingi tańda Qazaqstanda 970 shetel azamaty bas bostandyǵynan aiyrý túrindegi jazasyn ótep jatyr. Al, shet elderde 922 Qazaqstan azamaty jazasyn óteýde. «Halyqaralyq sharttar týraly» Zańǵa sáikes, Shart ratifikatsiialaýǵa jatady. Sebebi, adam quqyqtaryna tikelei qatysty. Zań jobasy respýblikalyq biýdjetten qosymsha qarajat talap etpeidi», - dedi B. Asylov.
