«Otandastar qory» KeAQ vitse-prezidenti Maǵaýiia Sarbasov sheteldegi qazaqtildi BAQ-ty qoldaý máselelerin kóterdi, dep habarlaidy QazAqparat.
«2020 jylǵy qańtardan jeltoqsan aiyna deiin «Sheteldik jáne Qazaqstan Respýblikasyna kóship kelgen etnikalyq qazaqtardy qoldaýdy qamtamasyz etý qyzmetteri» aiasynda QR Aqparat jáne qoǵamdyq damý ministrliginiń memlekettik tapsyrmasy oryndaldy. Zertteý aiasynda jalpy 11 memlekettegi 88 qazaqtildi BAQ pen qandastarymyz qoldanatyn áleýmettik jelidegi toptardyń derekqor bazasy jasaldy. Sonyń ishinde 14 gazet, 14 jýrnal, 5 telearna, 11 sait, 5 radio, áleýmettik jelide 39 toptyq paraqshalar bar. Biyl osy sheteldegi qazaqtildi BAQ birlestigin qurýdy josparlap otyrmyz», - dedi M. Sarbasov Otandastar qory janyndaǵy qoǵamdyq komissiia otyrysynda.
Osy aqparat quraldarynda jariialanǵan materialdarǵa monitoring jasap, saralaý nátijesinde birqatar ózekti máseleler anyqtalǵan.
«Kórshiles alys-jaqyn shet memleketterde qarjy tapshylyǵy saldarynan dástúrli qazaqtildi aqparat quraldarynyń (gazet-jýrnal, telearna, radio) sany azaiǵan. Atap aitsaq, Mońǵoliiada sońǵy 4-5 jyldan beri «Bilim» gazeti, TV-4 telearnasy, Baiolke.com saity, Reseide – Omby oblysynan shyǵatyn «Ata-Meken», Astrahanda «Aq arna» gazetteri jabyldy. Qarjy tapshylyǵyn Ózbekstandaǵy qazaqtildi aqparat quraldary da sezinip otyr. Ondaǵy qandastarymyzdyń aitýynsha, aýdandyq jáne oblystyq gazet-jýrnaldar memlekettik mekeme bolyp sanalady. Biraq, memleket esebinen bólingen qarjynyń jetkiliksizdiginen gazet-jýrnaldar jeke azamattardyń qoldaýymen shyǵarylýda.
Osyndai túiitkildi máselelerdi eskere otyryp, QR Syrtqy ister ministrligi iske asyratyn elimizdi shetelderge tanytatyn imidjdik aqparattyq jobalar baǵdarlamalary arqyly jyl saiyn iriktep, 10 sheteldegi qazaq tildi BAQ-tyń árqaisysyna 1 million teńgeden qarjylai kómek kórsetýdi qolǵa alý qajet dep esepteimiz. Osy ýaqytqa deiin olardy qandastarymyz jeke óz qarjylaryna shyǵaryp keldi. Syrttaǵy baýyrlarymyzdyń bul otansúigishtik, eljandylyq áreketine otyz jyldan keiin qoldaý kórsetetin kez kelgen siiaqty», - deidi M. Sarbasov.
