Sheshenstannyń memlekettik "Groznyi" telearnasy Instagram-da bilikti synaǵany úshin jylap keshirim suraǵan jergilikti jasóspirim týraly siýjet kórsetti. BBC-diń jazýynsha, siýjet efirge 26 shildede shyqqan.
"Ekstremistik mazmundaǵy kommentarii jáne onyń zardaby" dep atalǵan siýjette 16 jastaǵy Magomed Ahmatovtyń áleýmettik jelidegi jazbalary jaily aitylady. Áleýmettik jelide jasóspirim Sheshenstandaǵy Ahmat Qadyrov atyndaǵy qaiyrymdylyq qorynyń isin mysqyldap, ony Resei prezidenti Vladimir Pýtinniń ainalasyndaǵy "top" dep ataǵan.
Siýjette jasóspirim Sheshenstan biliginen keshirim suraidy. Odan keiin Sheshenstan respýblikasynyń múftii Salah Mejievtan sógis estidi. Sóz arasynda qolyndaǵy qaǵazǵa qarap, jasóspirimniń áleýmettik jelide jariialaǵan jazbasynan úzindiler oqyǵan múfti uzaq sóileidi.
Videoda Ahmatovtyń dosy dep kórsetilgen Ibragim Bersanov esimdi azamat sóileidi. Ol dosynyń "úiden birneshe kún boiy shyqpai júrgenin" aitady.
Sheshenstan telearnasyna Magomedtiń anasy Aza Ahmatova da suhbat bergen. Úsh balany jalǵyz asyrap otyrǵan áiel sheteldik kólik pen jóndeýden ótken úlken úidiń janynda turyp kólik te, úi de óziniki ekenin aitady. Anasynan ózge jasóspirimniń aǵalarynyń biri de sóilep, "sheshen zańy boiynsha, týysy jasaǵan isi úshin ózderi jaýap berýi kerek ekenin" aitqan.
Siýjettiń sońynda Sheshenstan basshysy Ramzan Qadyrovtyń Sheshenstan úkimetiniń ministri Jambýlat Ýmarovpen suhbaty berilgen. Onda Qadyrov "respýblika basshylyǵy jastar arasynda ekstremizmniń taralýyna jol bermei, kúresedi" dep aitqan.
