Sheshenstan basshysynyń resmi portalynda Ramzan Qadyrovtyń 2020 jylǵa arnalǵan tabys deklaratsiiasy jariialandy. Qujatqa qaraǵanda, respýblika basshysynyń tabysy bir jylda eki ese ósken dep habarlaidy Azattyqtyń Soltústik Kavkaz qyzmeti.
2020 jyly Qadyrov 381 million rýbl (5 million dollar shamasynda) tapqan. Sheshenstan basshysynyń 2019 jyldaǵy tabysy 147 million rýbl, 2018 jyldaǵy tabysy 7,5 million rýbl bolǵan. Iaǵni, keiingi eki jylda Ramzan Qadyrovtyń tabysy 50 ese ósken. Kiristiń kózi kórsetilmegen.
Sheshenstan basshysynyń menshiginde jalpy aýdany 32 myń sharshy metr bolatyn eki jer ýchaskesi men aýdany 2344 sharshy metr jeke úi kórsetilgen. Al áieliniń atyna 209 sharshy metrden turatyn páter jazylǵan.
Resmi turǵynda Qadyrovtyń atyndaǵy eshqandai avtokólik joq. Biraq ol ainalasyndaǵy adamdarǵa sheteldiń qymbat kólikterin jii syiǵa tartady jáne oq ótpeitin limýzinderin maqtan tutady.
- "Joǵary laýazymdy adamdardyń millioner ekeni qupiia emes. Olardyń "Piaterochkaǵa" (azyq-túlik dúkenderiniń jelisi) baryp, taksi ustaýǵa muqtaj emes ekeni de qupiia emes" dedi saiasattanýshy Konstantin Kalachev Azattyqtyń Soltústik Kavkaz qyzmetine Qadyrovtyń tabysy týraly pikir bildire otyryp.
- Azattyqtyń Soltústik Kavkaz qyzmeti sóilesken sarapshynyń aitýynsha, Qadyrov tabysynyń 2019 jyldan keiin kúrt ósýine onyń Batys sanktsiialaryna iligýi túrtki bolýy múmkin: ol endi aqshasyn shetelde emes, Reseide ustaýǵa májbúr.
- "Proekt" basylymy jaqynda Ramzan Qadyrov týraly zertteý jariialap, onyń taǵy bir áieli baryn, Máskeýde sonyń atyna qymbat páterler jazylǵanyn habarlady. Zertteýde Sheshenstan basshysynyń áielderi jalpy quny kemi 800 million rýbl (10,6 million dollar) bolatyn múlikke ie ekeni aitylady. Jýrnalister Qadyrovtyń ómir salty onyń resmi tabysyna sai kelmeidi dep atap ótken. Kreml Qadyrovtyń tabysy týraly jýrnalistik zertteý qosymsha tekserýge negiz emes dep málimdedi.
