Sherýge resmi ruqsat berilýi mańyzdy másele. Mundai pikirdi belgili qoǵam qairatkeri Murat Ábenov bildirdi, dep habarlaidy QazAqparat.
«Qazirgi ýaqytta azamattardyń arasynda saiasi belsendilik óte joǵary. Muny ótken sailaýmen de bailanystyramyz. Degenmen, sońǵy 3-4 jylda qoǵam qatty ózgerdi, quqyqtyq saýattylyǵy joǵarylady. Búginde «qoǵamda bir nárse aitsań, ony barlyǵy birdei qabyldaidy» dep aitýǵa bolmaidy. Iaǵni, qoǵam ózgergennen keiin ár aitylǵan máseleni ortaǵa salyp talqylap otyrǵan jón. Osy turǵyda búgingi Joldaýdan ózime kerek dúnieniń basym bóligin estidim», - dedi qoǵam qairatkeri Qazaqstan Prezidenti Qasym-Jomart Toqaevtyń Qazaqstan halqyna Joldaýyna orai pikir bildire kele.
Onyń atap ótýinshe, búgingi Joldaýda qysqa jáne uzaq merzimdi máseleler qamtylǵan. Qysqa merzimdi máselelerge aviatsiia, temir jol biletteriniń tapshylyǵy syndy problemalardy jatqyzsaq, uzaq merzimdi máselede saiasi júieni jańǵyrtý jaiyn aitýǵa bolady.
«Sońǵy jyldary azamattar áleýmettik, ekonomikalyq qana emes saiasi da talap qoiyp otyr. Aitalyq, aldaǵy ýaqytta ekonomikany damytý úshin mindetti túrde saiasi ózgerister jasaýymyz kerek degen pikir bar. Buryn biz kerisinshe, aldymen ekonomika, sodan keiin saiasat dep aitatynbyz. Al búgin osy másele qozǵalyp, sherýge shyǵýǵa ruqsat beriletindigi resmi aityldy. Menińshe, bul - mańyzdy másele», - dedi Murat Ábenov.
Áriptesin qoldaǵan saiasattanýshy Erlan Sairov shet memleketterde oryn alyp jatqan sherýlerden eshkimniń de utylyp jatpaǵanyn aitty.
«Menińshe, bul júie jaqyn arada Qazaqstanǵa da kiredi. Bul durys nárse. Sonymen qatar áleýmettik máseleler de bar. Olar bolashaqta sheshiledi degen oidamyz. Osy oraida atap óterlik taǵy bir másele bar. Bizdiń bolashaǵymyz - jastar. Jastardyń áleýmettik liftilerin jasaý, olardyń bolashaqqa degen kózqarasyn ózgertý syndy máseleler qarastyryldy. Bul da óte oryndy másele», - dedi ol.
Aita keteiik, Memleket basshysy Qasym-Jomart Toqaev búgingi Joldaýynda elde mitingke shyǵý úshin arnaiy oryn berilýi múmkindigin aitty.
