Bul jaiynda QR Premer-Ministri Álihan Smaiylovtyń Senat depýtattary joldaǵan saýalyna bergen jaýabynda aitylǵan, dep habarlaidy QazAqparat.
«Biyl qazaq ádebieti men jýrnalistika salasynda óshpes iz qaldyrǵan belgili qalamger Sherhan Murtazanyń týǵanyna 90 jyl tolyp otyr. Jazýshynyń el múddesi úshin atqarǵan eńbegi memleket tarapynan joǵary qurmetke laiyq. Bul rette qoldanystaǵy «Mereitoilar men ataýly kúnderdi merekeleý týraly» Úkimet qaýlysyna sáikes jekelegen tulǵalardyń mereitoilary alǵashqy júz jyldyqta – júz jyldyǵy, odan keiingi júzjyldyqtarda árbir jiyrma bes jylda atalyp ótedi. Osy oraida Sh.Murtazanyń mereitoiy zańnamaǵa sáikes merzim tolǵan kezde mereitoilar tizbesine engizilip, tiisti jumys júrgiziletin bolady», - dep atap ótedi Úkimet basshysy Senat depýtattarynyń saýalyna bergen jaýabynda.
Degenmen, onyń dereginshe, búgingi kúni tulǵanyń esimin ulyqtaý maqsatynda birqatar is-sharalar júzege asyrylýda.
Atap aitqanda Sh.Murtazanyń esimi Jambyl men Túrkistan oblystarynda 6 obektige (bilim berý, mádeniet mekemeleri), Aqtóbe oblysy men Almaty qalasynda kóshelerge berilgen.
Al Nur-Sultan qalasy kósheleriniń birine Sh.Murtazanyń esimin berý týraly usynys osy 15 maýsymda ótken Nur-Sultan qalasy máslihaty kópshilik tyńdaýlarynda qoldaý taýyp, budan ári qoldanystaǵy zańnama talaptaryna sáikes tiisti jumys júrgizilip jatyr.
«Al bilim mekemeleriniń birine jazýshy esimin berý usynysy aldaǵy ýaqytta ótetin qalalyq onomastika komissiiasynyń otyrysyna engiziledi. Sondai-aq týǵan jeri Jambyl oblysy Jýaly aýdany, Talapty aýylynda Sherhan Murtaza ádebi-memorialdyq úiiniń ashylýy, «Aýyldy, seni saǵyndym...» atty Sh.Murtazanyń qoljazbalary jinaǵynyń tusaýkeseri, respýblikalyq ǵylymi-praktikalyq konferentsiia, «Sherhan oqýlary» baiqaýy, oblystyq aqyndar aitysy, ulttyq sport túrlerinen jarystar, saltanatty jiyndar, «Shynnyń júzi - Sheraǵa» respýblikalyq aqyndar músháirasyn jáne Nur-Sultan men Almaty qalalaryndaǵy ulttyq kitaphanalarda tulǵanyń kitap kórmesi men dóńgelek ústel, Almaty qalasynyń ortalyqtandyrylǵan kitaphana júiesinde birqatar is-sharalar ótkizý josparlanyp otyr», - dedi Álihan Smaiylov.
Premer-Ministrdiń atap ótýinshe, búgingi kúni Taraz qalasynda Sh.Murtazaǵa arnap ornatylatyn eskertkishtiń eskiz jobalary Jambyl oblysy ziialy qaýym ókilderinen quralǵan arnaiy komissiiada saralandy.
Aldaǵy ýaqytta jobalar Qazaqstan Respýblikasynyń Monýmenttik óner qurylystaryn ornatý jónindegi memlekettik komissiianyń qaraýyna joldanyp, zańnamada belgilengen tártipke sáikes tiisti jumys júrgiziledi.
Derekti film túsirý týraly sheshim «Kinematografiia týraly» Qazaqstan Respýblikasy Zańyna sáikes ýákiletti organ - Saraptama keńesiniń oń qorytyndysy jáne Ulttyq filmderdi memlekettik qarjylyq qoldaý máseleleri jónindegi vedomstvoaralyq komissiianyń usynymy negizinde qabyldanady.
«Atalǵan másele boiynsha kinojobalardyń avtorlary tarapynan ashyq konkýrs arqyly usynys berilgen jaǵdaida, «Ulttyq kinony qoldaý memlekettik ortalyǵy» kommertsiialyq emes aktsionerlik qoǵamy belgilengen tártipke sáikes keńes pen komissiianyń qaraýyna jinaqtap engizedi. Ári qarai másele zańnama aiasynda qarastyrylady. Sonymen qatar múddeli memlekettik organdarǵa Sh.Murtazanyń 90 jyldyq mereitoiyn atap ótý jónindegi is-sharalar josparyn ázirleý jáne tiisti jumysty uiymdastyrý tapsyryldy», - dedi ol.
