Foto: Belarýs Prezidentiniń resmi saitynan
Qazaqstandyq jas oryndaýshy Sherhan Arystan «Vitebskidegi Slavian bazary» halyqaralyq óner festivali aiasynda ótip jatqan «Vitebsk» XXI halyqaralyq balalar mýzykalyq baiqaýynyń Gran-priin jeńip aldy, dep habarlaidy "Ult aqparat" Mádeniet jáne sport ministrliginiń baspasóz qyzmetine silteme jasap.
Qazylar alqasy 12 jastaǵy Sherhanǵa konkýrstyń 2 kúninde de joǵary baǵa (70 ball) berdi. Osylaisha, otandasymyz jalpy sany 140 ball jinap, eń joǵary nátijege qol jetkizdi.
Ekinshi oryndy jergilikti jas ónerpaz Sofiia Rýstamova (136 upai) alsa, úshinshi oryndy armeniialyq Anait Galstian (133 upai) ielendi. Konkýrsqa 8-14 jas aralyǵyndaǵy barlyǵy 18 eldiń jas oryndaýshylary qatysty.
Baiqaýdyń alǵashqy kúninde Sherhan Andrea Bochelli, Devid Foster jáne Emi Fosterdiń "Ama, Credi e vai" ("Súi, sen jáne qadam jasa") kompozitsiiasyn oryndady.
Aita keteiik, Almaty oblysynyń týmasy osyǵan deiin de birneshe halyqaralyq baiqaýdyń laýreaty atanǵan.
"Halyqaralyq festival osymen aiaqtalǵan joq. «Vitebskidegi Slavian bazary» aiasynda estradalyq án oryndaýshylar baiqaýynda elimizdiń namysyn Quralai Meirambek qorǵaidy.
Eresekter baiqaýyna álemniń 30 elinen úmitker qatysady. Qazaqstandyq oryndaýshylar buǵan deiin atalǵan baiqaýdyń birneshe márte jeńimpazy atanǵan. Dimash Qudaibergen (2015 j.) men Rýhiia Baidúkenova (2021 j.) Gran-pri jeńip alsa, ár jyldary Marjan Arapbaeva, Álisher Kárimov, Marhaba Sábi jáne basqa da otandyq ónerpazdar joǵary marapatqa qol jetkizgen edi" - delingen ministrlik habarlamasynda.
