Senat spikeri Máýlen Áshimbaev Qazaqstanǵa kóshkisi keletin reseilikter jóninde jýrnalister suraǵyna jaýap berdi, dep habarlaidy Ulysmedia.kz tilshisi.
«Soǵystan beri Qazaqstanǵa on myńdap kóshýdi kózdegen reseilikterdiń sany ol eldegi ishinara jumyldyrýdan keiin júz myńdap kóbeiýi múmkin. Shekara arqyly onsyz da myńdap Qazaqstanǵa kóshkisi keletinder telegram-arnalar arqyly ártúrli amal qarastyryp jatyr. Bul bizdiń ulttyq qaýipsizdigimizge qater týǵyzbai ma? Qazaqstannyń kúsh qurylymdary tiisti shara qabyldaýy kerek dep eseptemeisiz be?» - degen suraq qoiyldy Áshimbaevqa.
Senat spikeriniń aitýynsha, bul máselelerdiń barlyǵyn Qazaqstannyń tiisti organdary qarap, baqylap otyr.
«Konsýltatsiialardyń barlyǵy júrip jatyr. Bul jerde biz bir nárseni eskerýimiz kerek. Bizdiń basqa eldermen kelisimderimiz, sharttarymyz bar. Soǵan sáikes mindettemelerimiz bar. Qazir bizge shetelden adam kóp kelip, olardyń bárine yqtiiarhat berilýi múmkin degen suraq týyndap jatyr. Eger Resei azamattary bizge kelgisi kelse, biz bul protsesti shektei almaimyz. Shektemeýimiz de kerek. Belgili bir sharýalarymen kelip, ketip qalatyn bolsa, bári zańnama sheńberinde bolsa, bul turǵyda eshqandai másele týyndamaýy kerek», - deidi Máýlen Áshimbaev.
Senat spikeri bul máseleni rettep otyratyn zańnamalar baryn atap ótti. Sózine qaraǵanda, Reseiden ǵana emes, basqa memleketten Qazaqstanǵa bir azamat kelgisi kelse, oǵan yqtiiarhat ońai berilmeidi.
«Kelgen azamat ákelýi tiis qujattar men toltyrýy tiis tizim bar. Sol qujattardy ol bizdiń quzyretti organdarǵa tapsyrýy kerek. Sol qujattardyń ishinde «atalǵan azamat ózi kelgen memlekettiń kelisimi de» bolýy kerek. Zańnamada bul naqty kórsetilgen. Tiisinshe, eger basqa eldiń azamatyna sol memleketi shyǵýǵa ruqsat bermese, iaǵni ol azamat tiisti qujatty tapsyrmasa, Qazaqstan yqtiiarhat bere almaidy. Sony túsiný kerek. Sol sebepti bizdiń zańnamada tiisti qujattardyń bári kórsetilgen», - dedi ol.
Sóz sońynda Áshimbaev BAQ ókilderin «jaǵdaidy ýshyqtyrmaýǵa, dramaǵa ainaldyrýǵa» shaqyrǵysy keletinin bildirdi.
«Bizdiń halyq bolyp jatqan jaǵdaidy durys qabyldaýy kerek. Dúrbeleń kóterýdiń qajeti joq. Memlekettik organdar bul jaǵdaidy biledi. Bul máseleni biz de baqylap otyrmyz», - deidi ol.
Eske sala ketsek Reseide ishinara mobilizatsiia jariialanǵan soń ol elde jappai dúrbeleń bastaldy. Reseilikterdiń kóbi shetel asyp ketýdi oilap, barlyq múmkindikti qarastyryp jatyr. Jelide Reseiden Qazaqstanǵa kelýge kómek beretin arnaiy Telegram-chattar da ashylǵan.
