Shekarashylar Almaty jáne Shyǵys Qazaqstan oblysynyń aýmaǵynan jabaiy qarasora ósken alqaptardy tapty, dep habarlaidy "Ult aqparat" QR UQK QSh baspasóz qyzmetine silteme jasap.
«Shonjy shekara otriadynyń «Tekes» jáne Kúrshim shekara otriadynyń «Órel» shekara zastavalarynyń aýmaǵynan shekarashylar jabaiy qarasora alqaptaryn tapty. Eki jerden tabylǵan alqaptyń jalpy kólemi - 5 gektar. Jergilikti atqarýshy organdar ókilderiniń qatysýymen ósimdik alqaby joiyldy. 9 myń túp esirtki ósimdiginiń jalpy salmaǵy 1,5 tonnadan asqan», delingen ótken táýlik boiynsha shekarashylar jumysynyń nátijesi kórsetilgen habarlamada.
Sondai-aq, keshe saǵat 22:00 shamasynda Saryaǵash shekara otriadyna qarasty «Yntymaq» zastavasynda shekaranyń buzylǵany jóninde belgi kelip túsken.
Oqiǵa ornyna attanǵan top Ózbekstannan elimizge qarai jasyryn ótpek bolǵan eki ózbekstandyqty ustady. Olar kúnkóris qamymen jumys izdeýge shyqqanyn aitqan. Qazir quqyq qorǵaý organdary osy is boiynsha tekserý júrgizip jatyr.
Budan basqa, qorǵastyq shekarashylar Halyqaralyq shekara boiy yntymaqtastyǵy ortalyǵynan qaityp kele jatqan 21 jastaǵy qazaqstantan salmaǵy 63 kg Qytaida shyǵarylǵan dári-dármek taýyp, aktimen Altynkól keden beketine tapsyrdy.
