Qazaq-qytai shekarasynan zańsyz ótip, 20 qazanda eki aiǵa qamalǵan Shyńjań qazaqtary Murager Álimuly men Qaster Musahanulyna "Pana izdeýshi tulǵa" kýáligi beriledi. Bul aqparatty advokat Baýyrjan Azanov habarlady.
Baýyrjan Azanovtyń Azattyqqa aitýynsha, "Pana izdeýshi tulǵa" mártebesin berý týraly sheshimdi Shyǵys Qazaqstan oblystyq kóshi-qon politsiiasy basqarmasy qabyldaǵan. Oblystyq basqarmadan bul týraly aqparat alý múmkin bolmady.
Azanovtyń sózinshe, eki azamatqa kýálik búgin, 29 qazanda berilýi tiis.
30 jastaǵy Qaster Musahanuly men 25 jastaǵy Murager Álimuly Dórbiljiń aimaǵynan shyǵyp, 1 qazanda Qytai shekarasynan ótkenderin rastaǵan. 14 qazanda Almatydaǵy adam quqyǵyn qorǵaý biýrosynda ótken baspasóz máslihatynda Qaster Musahanuly Shyńjańdaǵy "saiasi lagerde qamaýda otyrǵanyn", Murager Álimuly Qytaida "qysym kórgenin" aitqan.
Baspasóz máslihatynan keiin olardy shekara qyzmetiniń ókilderi áketip, 15 qazanda tergeý amaldarymen Shyǵys Qazaqstanǵa aparylǵan. UQK Shekara qyzmeti Qaster Musahanuly men Murager Álimulynyń ústinen Qylmystyq kodekstiń 392-baby 1 bóligi, iaǵni "Qazaqstan shekarasyn zańsyz kesip ótý" baby boiynsha tergeý júrip jatqanyn habarlaǵan. Ekeýi qazir Óskemendegi ýaqytsha tergeý izoliatorynda qamaýda otyr.
Almaty oblysynyń kóshi-qon politsiiasy "Pana izdeýshi tulǵa" kýáligin buǵan deiin, 2018 jyldyń tamyzynda alǵash ret Sairagúl Saýytbaiǵa bergen. Qazaq-qytai shekarasynan zańsyz ótti dep aiyptalǵan Qytaidyń etnikalyq qazaǵy Sairagúl Saýytbai ústinen júrgen sot protsesi "pana izdeýshi tulǵa" kýáligin alǵannan keiin de toqtamaǵan. Almaty oblystyq kóshi-qon politsiiasy Sairagúl Saýytbaiǵa bergen "Pana izdeýshi tulǵa" mártebesiniń merzimin birneshe ret uzartqan. Qazaqstannan bosqyn mártebesin ala almaǵan Sairagúl Saýytbai Shvetsiiaǵa ketken.
