Senat depýtaty Olga Býlavkina shekaradaǵy aýyldar máselesin kóterip, Úkimet basshysynyń atyna depýtattyq saýal joldady, dep habarlaidy "Ult aqparat".
Senatordyń aitýynsha, basqa eldermen shekaralas aýyldarda 1,5 millionǵa jýyq adam turady.
«Halqy 200 adamǵa jetpeitin 1300-ge tarta aýyl memleket nazarynan tys ári qoldaýsyz qaldy. Tek keiingi úsh jyldyń ózinde «Nurly jer» baǵdarlamasy boiynsha 10 million sharshy metrden astam turǵyn úi salyndy. Alaida qarajatty bólý kezinde basty nazar Nur-Sultan, Almaty qalalaryna, oblys jáne aýdan ortalyqtaryna aýdaryldy», - dedi Olga Býlavkina Senat otyrysynda.
Depýtattyń aitýynsha, tipti turǵyn úi salynyp qoiǵan aýyldardaǵy jer ýchaskeleri máselesi de rettelmegen. Sondai-aq senator jeke turǵyn úi salý máselesi de ol aýyldarda kúrdeli ekenin jetkizdi.
Onyń aitýynsha, halqy 5 myń adamnan turatyn aýyldar sý jáne elektr jelilerimen qamtamasyz etilýi kerek. Alaida keibir aýdanda oǵan bóler qarajat joq. Munyń saldary azamattardyń jer ýchaskesin alý quqyǵyn shektep otyr.
Shekaralas aýdandarda qajetti materialdyq jáne áleýmettik ortany qalyptastyrý úshin ne istelip jatyr? Shekaralas aýdandarǵa grant bólý nemese olardy qandai bir memlekettik turǵyda qoldaý sharalary qarastyryp jatyr ma? Salyq jaǵynan ol jaqtaǵy turǵyndarǵa jeńildik berile me? Olga Býlavkina Úkimet basshysyna osy saýaldardy qoiyp, belgilengen merzim ishinde jaýap berýdi ótindi.
Sondai-aq depýtat atalǵan aýdandarda Jumyspen qamtý men biznestiń jol kartasy durys júzege asyrylmai jatqanyna nazar aýdarýǵa shaqyrdy.
