Erlan Sairov jýrnalisterge Ulttyq qoǵamdyq senim keńesine qalai múshe bolǵanyn aityp berdi, dep habarlaidy QazAqparat.
BAQ ókilderiniń Ulttyq keńes quramyna qatysty saýaldaryna jaýap bergen Erlan Sairov uiymǵa óziniń qalai múshe bolǵanyn aityp berdi.
«Jeke maǵan Ulttyq keńes týraly Jarlyq shyǵardan eki kún buryn Prezident keńesshisi habarlasyp, usynys aitty. Men usynysty qabyldai otyryp, ózimniń tórt másele boiynsha ustanymymdy aittym. Olardyń ishinde sailaý, mitingter, saiasi partiialar jáne BAQ týraly zańdardy boiynsha fýndamentaldy usynystar bar», - dedi ol.
Sarapshy shekaradaǵy aýdandardyń jaǵdaiyn jaqsartý úshin Ulttyq keńes aiasynda qandai usynystardy memleket aldyna qoiatynyn da aitty.
«Tarihtan belgili bir zańdylyq bar. Shekarany shekarashylar ǵana emes, jergilikti halyq ta kúzetýi kerek. Sonda ǵana ol shegendi bolady. Shyǵystaǵy Katonqaraǵai, Marqakól, Aqsýat, Maqanshy óńirlerinen el údere kóship ketken. Mysaly burynǵy Marqakól aýdanynda osydan 30 jyl buryn 27 myń adam turǵan. Qazir tek 6 myń adam qalǵan. Muny gýmanitarlyq problema dep te ataýǵa bolady. Dál osyndai problema Almaty oblysynda da bar. Bul máseleni sheshý úshin kezinde qysqaryp qalǵan aýdandardy qaita qurý qajet. Sodan keiin shekaralyq aimaqtardy damytý jónindegi memlekettik baǵdarlama jasaý kerek. Bul óte mańyzdy. Ulttyq keńeste bul másele de talqylanatyn bolady», - dedi Erlan Saiyrov.
