Úkimet basshysy Baqytjan Saǵyntaev shekara arqyly júkterdi tezdetip ótkizýdi tapsyrdy. Áitpese, tranzittik kompaniialar úshin júkterdi Resei arqyly tasymaldaǵan tiimdi bolyp otyr, dep xabarlaidy Ult.kz tilshisi QazAqparat agenttigine silteme jasap.
«Ótkende biz konsýltanttarmen keńestik. Olar aitady, Qytai-Qazaqstan shekarasyna qaraǵanda, Qytai-Resei shekarasynda júkterdi tez ótkizedi. Ol jaqta jyldam isteidi. Alaida Asqar Uzaqbaiuly (Úkimet basshysynyń orynbasary - avt.) olai emes deidi. Al Dúniejúzi bankiniń sarapshylary qaǵaz júzinde jasalǵan jumysqa qaramaidy. Olar júkterdi ótkizý jyldamdyǵyn baǵalaidy», - dedi Saǵyntaev Ministrler kabinetiniń búgingi otyrysynda.
Úkimet basshysynyń aitýynsha, Reseimen salystyrǵanda, Qazaqstan shekarasy arqyly júkterdi jetkizý ýaqyty bes kúnge jyldam bolsa da, shekarada ketken ýaqytpen utylýymyz ábden múmkin. Osy oraida Premer-Ministr qarjy ministrligine júkterdi tekserý salasyna ozyq texnologiialardy tezdetip engizýdi tapsyrdy. «Men texnikalyq máselelerdiń bar ekenin túsinemin. Júkterdi bir jerden ekinshi jerge qaita tieý kerek jáne taǵysyn taǵy. Degenmen, qoldan kelgenshe júkterdi barynsha tez ótkizý qajet», - dep atap kórsetti Baqytjan Ábdiruly.
