Pavlodarda avtobýs júrgizýshisi esirtki qabyldap, rýlge otyrǵan, dep habarlaidy QazAqparat Pavlodarnews.kz saityna silteme jasap.
Patrýldik politsiia batalonynyń qyzmetkerleri Nurmaǵambetov kóshesinde baǵdarshamǵa toqtap turǵan «PAZ-32053» avtobýsy júrgizýshisiniń oǵash minezine nazar aýdarǵan.
Salonda eshkim bolmasa da, júrgizýshi qoldaryn erbeńdete bulǵap, shegi qata kúlip, únemi ainalasyna jaltaqtaýmen bolǵan. Politseiler tekserý úshin avtobýsty toqtatty.
Oblystyq Politsiia departamentiniń málimetine sáikes, meditsinalyq kýálandyrý júrgizýshiniń esirtkige elitip alǵanyn rastady.
Júrgizýshiniń aitýynsha, ol aýyryp turǵandyqtan, esirtkini aýyrsynýdy basý úshin qabyldap alǵan.
Júrgizýshige qatysty QR ÁQBtK 608-babynyń 1-bóligi boiynsha ákimshilik is qozǵaldy.
Kólik quraly arnaiy aiyp turaǵyna qoiyldy. Material sotta qaralyp, sot qaýlysymen júrgizýshi 7 jyl merzimge kólik quraldaryn basqarý quqyǵynan aiyryldy, sondai-aq 15 táýlik merzimge ákimshilik qamaýǵa alyndy.
Aita keteiik, biyl mas kúiinde kólik júrgizgeni úshin oblysta 1310 júrgizýshi ákimshilik jaýapkershilikke tartyldy.
