Qyzylorda qalasynyń 200 jyldyq mereitoiyna arnalǵan sharalar «Syr súleileri» alleiasynda etnoaýyldan bastaý aldy. Merekelik sharaǵa óńirge jumys saparymen kelgen Qazaqstan Respýblikasynyń Memlekettik hatshysy Gúlshara Ábdiqalyqova, oblys ákimi Qyrymbek Kósherbaev qatysty.
Etnoaýylda jaǵalai qonystanǵan kiiz úilerde qala tarihy men eldegi ózgeris, tyń bastamalardan habardar etetin kórme daiyndalǵan. Al arnaiy tigilgen aq shatyrlarda qala meiramhanalary ulttyq as mázirin, sharýa qojalyqtary qymyz, shubat, qaýyn, qarbyzdy qala turǵyndary men qonaqtaryna tartý etti. Sondai-aq, bir mezette 200-ge tarta dombyrashy kúi tartyp, Qorqyt dalasy kúmbirlegen kúige tundy.
Merekege orai qalaǵa qarasty sharýashylyq qurylymdary festivalǵa 600 litr qymyz, 600 litr shubat, 8 tonna qaýyn men qarbyz, 100 keli qaýyn qaq pen qaýyn qurt, 200 qorap baýyrsaq ákelgen. Jalpy festivaldaǵy barlyq ónimder elge tegin úlestirildi. Shara barysynda asyq atý, toǵyzqumalaq, qol kúres syndy sporttyq saiystar uiymdastyrylyp, úzdikter anyqtaldy.
Sapar barysynda Gúlshara Naýshaqyzy Ábdildá Tájibaev atyndaǵy oblystyq ǵylymi ámbebap kitaphana jumysymen tanysty. Munda «Art stýdiia» jas sýretshileriniń týyndylaryn tamashalap, Qaltai Muhamedjanovtyń jeke kitaphanasyn, «Shańyraq» intellektýaldy ortalyǵyn aralap kórdi. Búginde kitaphanadaǵy kitap sany – 412 472 dana. Zaman talabyna sáikes, oqyrmandar arasynda emin-erkin qarym-qatynas ornatatyn, jastarǵa yńǵaily alań jasaý maqsatynda kitaphanadan «BOOK kafe» jáne kovorking ortalyǵy ashylǵan. Al Qaltai Muhamedjanovtyń jeke kitaphanasynda 8 myńǵa jýyq kitap, jazýshynyń jeke zattary, jazý quraldary, kádesyilary men portreti qoiylǵan.
Munan keiin Memlekettik hatshy IT ortalyqtyń jumysymen tanysty. Jastardyń aqparattyq-kommýnikatsiialyq tehnologiialar salasyndaǵy startap jobalaryn qoldaýǵa baǵyttalaǵan IT ortalyqta túrli robototehnikalyq prototipterdiń óndiristik jobalaryn ázirleýge múmkindik bar. Búginde aimaqta barlyq sala boiynsha tsifrlandyrý jumystary qarqyndy. Oblys ákiminiń orynbasary Evgenii Kim biyl aqyldy basqarý baǵyty boiynsha bilim berý, densaýlyq saqtaý, turǵyn úi-kommýnaldyq sharýashylyq, kólik jáne qaýipsizdik salasy boiynsha 37 jobany júzege asyrý bastalǵanyn aitty. Aitalyq, bilim berý salasy boiynsha aimaqtaǵy 293 mektep tolyǵymen «Kúndelik» elektrondy jýrnalyna kóshse, densaýlyq saqtaý salasynda «Damu med» mobildi qosymshasy qoldanysqa engizildi. Salada búgingi kúni 25 meditsinalyq nysan elektrondyq formatqa kóshse, jyldyń aiaǵyna deiin 62 qujat elektrondy formatqa kóshiriledi. Sondai-aq, qazirgi kezde qaladaǵy 19 kóppáterli turǵyn úi «E-Shanyraq» júiesine qosylǵan. Al kólik sektoryn tsifrlandyrý qyzmet kórsetý sapasyn 30 protsentke arttyrdy. Munan ózge aimaqta tsifrlandyrý baǵytynda tyń bastamalar, oqýshylarǵa tsifrlyq bilim berý jumystary jolǵa qoiylǵan.
