Almatydaǵy №199 gimnaziia oqýshylarynyń ata-analary Sharyn shatqalyndaǵy apatqa muǵalimder men mekteptiń eshqandai qatysy joq ekenin aitty, dep habarlaidy "Ult aqparat".
Búgin atalǵan mektep ǵimaratynda qalalyq politsiia búkil ata-analardan jaýap ala bastady. Arasynda balasy ekskýrsiiaǵa barmaǵandar da bar. Olar Sharynǵa saiahat týraly aityp berdi.
«Bizdi jaýap alýǵa shaqyrdy. Biraq bizden ne úshin jaýap alyp jatyr, sony túsine almai turmyn. Meniń balam Sharyn shatqalyna barǵan joq», - dep tańǵalady ata-analardyń biri.
Jinalǵan ata-analar mektep pen muǵalimderge eshqandai shaǵymy joq ekenin aitty.
«Mekteptiń buǵan esh qatysy joq. Bul ekskýrsiiany ata-analardyń ózderi uiymdastyrdy. Biz balalarymyz sabaqtan keiin azdap demalsyn degen edik. Óitkeni olar onlain oqyp, kópten beri kórispegen bolatyn. Biraq men balamdy jibermedim, sebebi ol jaqqa týystarymyzben birge barǵan edik», - deidi mektep oqýshysynyń anasy Ainur Táshimova.
Onyń aitýynsha, Sharyn shatqalyna ekskýrsiia uiymdastyrý ideiasy ata-analardan shyqty.
«Sharyn shatqalyna 5-synyp oqýshylary bardy. Munda muǵalimderdiń esh qatysy joq, kerisinshe, ózderi balalardy qutqaram dep aýrýhanaǵa tústi. Ata-analar muǵalimderge Sharynǵa birge barýdy usyndy, olar kelisimin berdi. Bizdiń olarǵa eshqandai shaǵymymyz joq, biz ózimiz uiymdastyryp, muǵalimderdi shaqyrdyq», - deidi ol.
Besinshi synyp oqýshylarynyń ata-analary 25 mamyrda demalys kezinde balalardyń qaýipsizdigine ózderi jaýapty ekenin aityp, qolhat bergen.
«Biz muǵalimderdi jaýapqa tarta ma dep qorqamyz. Mektep zardap shekpeýi kerek. Olardyń ústinen qylmystyq is qozǵalmasa eken. Muǵalimder balalarymyzǵa óz balasyndai qaraidy. Bul oqiǵa olardyń bizdiń balalarymyzǵa beijai qaramaitynyn taǵy bir dáleldedi. Balalar óz muǵalimderin qatty qurmetteidi. Sondyqtan keibir ata-analar balalaryn esh qiyndyqsyz muǵalimderge senip jiberdi», - deidi ata-ana.
Eske salaiyq, 29 mamyr kúni Almatynyń №199 mektebiniń 5-synybynda oqityn 8 oqýshy, 5 ata-ana jáne 3 muǵalim Sharyn shatqalyna saiahatqa shyqqan.
Shatqalda kenet sel júrip, 2 adam mert boldy, bir adam iz-túzsiz joǵalyp, taǵy altaýy zardap shekti.
Keiinnen QR Bilim jáne ǵylym ministrligi atalǵan oqiǵa saldarynan 1 oqýshy men 1 muǵalimniń qaza tapqanyn, taǵy bir oqýshyny izdeý jumysy júrip jatqanyn málim etti.
Mert bolǵan ustaz - 26 jastaǵy Merei Ibragimov kórkemóner pánderinen sabaq bergen. Eńbek ótili – 5 jyl.
