Foto: Tengrinews.kz
Elimizdiń ulttyq parkteri týrister arasynda barǵan saiyn tanymal bola túsýde. Byltyr qoryqtarǵa 2,8 millionnan astam adam baryp, bul kórsetkish 2023 jylmen salystyrǵanda 18 paiyzǵa artqan. Ile-Alataý ulttyq parki, Sharyn shatqaly, Altyn-Emel jáne Kólsai kólderi — eń kóp baratyn oryndar qatarynda, dep habarlaidy Ult.kz.
Týrizm jáne sport ministrligi Memleket basshysynyń ishki týrizmdi damytý jónindegi tapsyrmalary aiasynda jańa ekotýristik baǵyttar ashyp, infraqurylymdy jaqsartý jumystaryn júrgizip jatyr. Qazirgi tańda 750 shaqyrymǵa jýyq tabiǵi marshrýt abattandyrylǵan. Jaqyn jyldary taǵy 350 shaqyrym joldy jabdyqtaý kózdelip otyr. Biyl toǵyz jańa týristik soqpaq salý josparlanǵan.
Iri bastamalardyń biri — Alatau Amanaty jobasy. Bul marshrýt Aiýsai vizit-ortalyǵynan bastalyp, Ile Alataýynyń kórkem jotalary arqyly Sharyn shatqaly men Tańbaly qoryq-mýzeiine deiin jalǵasatyn 1200 shaqyrymdyq joldy qamtidy. Baǵyt boiynda etnoaýyldar, kempingter, glempingter, gastrotýrizm nysandary salynyp, jobanyń ózi ishki jáne halyqaralyq oqiǵaly týrizmge arnalǵan tutas ekojúiege ainalmaq.
Bastama KazAlpineClub qoǵamdyq birlestigine tiesili. Ony AMANAT partiiasy, QR Týrizm jáne sport ministrligi, Kazakh Tourism ulttyq kompaniiasy, Almaty qalasy men Almaty oblysy ákimdikteri qoldaýda.
Marshrýt boiyndaǵy negizgi aialdamalar — týrister úshin tartymdy tarihi jáne tabiǵi oryndar: «Esik» qoryq-mýzeii, Kók-Jailaý, Býtakovka, Alma-Arasan bulaqtary, Úlken Almaty kóli, Talhiz qalashyǵy jáne Oi-Qaragai taý kýrorty.
Jobanyń iske qosylý kúni qatysýshylar «Taza Qazaqstan» aktsiiasy aiasynda ekologiialyq senbilik uiymdastyryp, taýly aimaqtardy tazartty.
Alatau Amanaty siiaqty jobalar turaqty týrizmdi damytyp qana qoimai, óńirlerde jańa jumys oryndaryn ashyp, jergilikti halyqtyń ál-aýqatyn arttyrýǵa yqpal etpek.
