Foto: okg.kz
Búgingi kúnde oblysta investitsiia tartý arqyly jańa jumys oryndaryn ashý baǵytynda jumystar jandanyp keledi. Bul baǵytta aýdandaǵy «Badam» indýstrialdy aimaǵynda jańa investitsiialyq jobalardyń qurylysy bastalǵan bolatyn. Oblys ákimi Darhan Satybaldy Ordabasy aýdanyna arnaiy issaparmen baryp, aliýminii profil buiymdaryn shyǵaratyn ««Central Asia Aluminum Company» JShS-in aralap, jumys barysyn baqylady. Zaýyttyń qurylysymen tanysqan óńir basshysy kásipkerlermen pikirlesti.
– Bizdiń óńirde jumys oryndaryn ashý mańyzdy. Sol sebepti óńirde iske qosylǵan árbir zaýyt óńir ekonomikasynyń damýyna úles qosady. Sondyqtan investitsiialyq jobalarǵa turaqty qoldaý kórsetiledi. Osy zaýyttarda bizdiń turǵyndar jumys isteidi, – dedi Darhan Satybaldy.
Issapar aiasynda óńir basshysy Badam aýylyndaǵy «RZN» JShS gazoblok shyǵaratyn zaýyttyń jumysymen tanysty. Jobanyń investitsiialyq quny 1 mlrd. 500 mln. teńgeni quraidy, al, onyń qýattylyǵy jylyna 85 myń tekshe metr. Jer aýmaǵy – 3 gektardy quraityn joba tolyqtai iske asqan kezde 25 adam jumyspen qamtylady dep kútilýde.
Aýdannyń óndiristi aimaǵyn aralap kórgen oblys ákimi memleket tarapynan usynylǵan jer ýaqtyly igerilip, kásiporyndar óz merziminde ashylýy kerek ekenin jetkizdi. Sonymen birge indýstrialdy aimaqty abattandyryp, kógaldandyrý qajettigin, jergilikti turǵyndardy úiretip, jumysqa tartý kerektigin de eskertti.
Deni saý urpaq – memleket bailyǵy
Sonymen qatar oblys ákimi Darhan Satybaldy Badam aýylyndaǵy zamanaýi sporttyq-saýyqtyrý kesheniniń ashylý saltanatyna qatysty.
– Óńirimizde aýyldy eldi mekenderdiń infraqurylymyn jaqsartý jumystary júrip jatyr. Bilim, meditsina, sport, mádeniet nysandary salynýda. Sport kesheni jastardyń salaýatty ómir saltyn ustanýyna qolaily bolatynyna senemiz. Osynda jattyqqan sportshy jastarymyz álemdik deńgeide Qazaqstannyń atyn shyǵarady degen úmittemiz, – degen óńir basshysy sport keshenin aralap, onda jattyǵyp jatqan sportshylarmen, bapkerlermen júzdesti.
Aýyl balalary men jasóspirimderdiń bos ýaqytyn tiimdi paidalanatynyna qýanǵan aýyl aqsaqaldary men turǵyndary rizashylyqtaryn bildirip, óńir basshysymen erkin pikir almasty. Osy kezdesýde usynystar aitylyp, aimaqty damytý joldary sóz boldy. Aldaǵy ýaqytta atalǵan sport kesheninde oblystyq Qajymuqan atyndaǵy №1 balalar men jasóspirimder sport mektebi ornalasady. Búginde bul sport mektebinde 1000-ǵa jýyq bala jattyǵyp júr.
Oblysta óndiris oryndaryn ashý, investitsiia tartýǵa basymdyq berilgen. Oblys ákimdiginiń qoldaýymen aýdan, qala ákimderi men kásipkerler kórshiles elderdiń kásiporyndaryn aralap, investorlarmen kelissózder júrgizip keledi. Bul kezdesýler búginde óz jemisin berýde. Ordabasy aýdanynda boi kóteretin zaýytta Qytai eliniń tájiribesi men joǵary tehnologiiasy qoldanylady dep kútilýde. Oblys ákimi Darhan Satybaldy jobany ýaqtyly júzege asyrý kerektigin basa aitty.
– Sheteldiń ozyq tehnologiialaryn meńgerip, batyl sheshimder qabyldaý kerek. Bul zaýyttyń josparlanǵan merzimde ashylýy qadaǵalanady. Jumys isteimin, halyqty jumyspen qamtimyn deitin investorlar men kásipkerlerimizge qoldaý kórsetiledi. Árdaiym sharýasy shiraq, tirligi myǵym aimaq ozady, – degen Darhan Satybaldy jańa zaýyttyń kapsýlasyn salý rásimine qatysty.
Is-shara barysynda «Altyn land» JShS-niń direktory Bereke Dúisebekov atalmysh jobanyń oblysqa tigizer paidasyn sóz etti. Onyń aitýynsha, qysh zaýytynda zamanaýi tehnologiialar qoldanylady.
Maqtaly óńir árdaiym maqtaýly bolmaq
Túrkistan oblysy – respýblikada maqta daqylyn ósiretin jalǵyz óńir. Maqta sharýashylyqtarynda 25 myń agroqurylymda 70 myńǵa jýyq adam eńbek etedi. Biyl maqta daqylynyń egis kólemi 106,4 myń gektardy qurady. Bul – jalpy egistiktiń 12 paiyzy.
Oblysta maqta sharýashylyǵyn damytýǵa basymdyq berilgen. Bul baǵytta tolyq tsikldi 9 maqta-toqyma klasterin qurý jumystary bastaldy. Ordabasy aýdanynda da maqta ónimdiligi men sapasyn arttyrý jumystary jyldan-jylǵa joǵarylap keledi. Sapar barysynda oblys ákimi Darhan Satybaldy Tórtkúl aýylynda ornalasqan maqta óńdeý zaýytynyń jumysymen tanysty. Óńir basshysy oblystaǵy maqta klasterin qurý baǵytynda aýqymdy jumystar atqarylyp jatqandyǵyn aita kele, ónim sapasyn arttyrýǵa, investorlar tartýǵa jan-jaqty qoldaý kórsetiletinin jetkizdi.
Sondai-aq, kezdesýde zaýyt basshysy jańa jobalardy tanystyryp, aldaǵy josparlarymen bólisti. Onyń aitýynsha, kásiporynda ónimdilikti jáne maqta sapasyn arttyrý maqsatynda túrkiialyq uryqtar egiledi. Kelesi jyldan bastap 250 gektar aýmaqqa tamshylatyp sýarý tehnikalaryn endirý kózdelip otyr. 2025-2026 jyldary zaýyt qaita jańǵyrtýdan ótkizilmek. 2027 jyly maqta klasterin qurý josparlanýda.
Aimaqta shaǵyn jáne orta kásipkerlik salasy jaqsy damý ústinde. Máselen, maqta talshyǵyn óndiretin «Nur-Agro 73» JShS-i óndiris qýattylyǵy jylyna – 35 000 tonna mejeni kórsetip otyr. Joba quny – 255 mln. teńge. Jeke kásipker 300-den asa azamatty jumyspen qamtyp otyr.
