Sharýashylyqtar úshin dizel otynynyń ortasha baǵasy litrine 165 teńgeni qurady. Bul týraly QR Aýyl sharýashylyǵy birinshi vitse-ministri Aidarbek Saparov málim etti, dep habarlaidy QazAqparat.
«Sharýalar tuqymdyq materialmen tolyq qamtylǵan. Tekserilgen tuqymdardyń 90 paiyzy birinshi, ekinshi egistik standartyna sai keledi. Ónimdilikti arttyrýdyń mańyzdy faktory tyńaitqyshtardy jetkilikti mólsherde qoldaný bolyp otyr. 500 myń tonnaǵa jýyq mineraldy tyńaitqyshtarǵa kelisimshart jasaldy. Búgingi tańda sharýalarǵa 400 myńǵa jýyq tonna jetkizildi, bul ótken jylmen salystyrǵanda 40 myń tonnaǵa artyq. Sharýalar ósimdikterdi qorǵaý quraldarymen qamtamasyz etilýde», - dedi birinshi vitse-ministri Ortalyq kommýnikatsiialar qyzmetinde.
Sonymen qatar ol naryqta munai ónimderiniń baǵasy kóterilgenin eske saldy.
«Baǵanyń ósýine qaramastan, Úkimet egis jumystarynyń dizel otynyna qajettiligin 100 paiyz qamtamasyz etý úshin barlyq sharalardy qabyldady. Sharýashylyqtar úshin dizel otynynyń ortasha baǵasy litrine 165 teńgeni qurady, bul naryqtan 14 paiyzǵa arzan», - dedi A. Saparov.
