Batys Qazaqstan oblysynda kiik sanyn retteý máselesi qarastyrylady. Oblys ákimi Ǵali Esqalievtiń jýrnalistermen kezdesýinde málim etkenindei, óńirde kiikter jyl saiyn kóbeiip keledi, dep habarlaidy QazAqparat.
Ákimniń aitýynsha, keiingi jyldary turǵyndar men sharýalardan kiikterdiń jaiylymdy otap ketkeni jóninde túsetin shaǵym jiilep barady.
«Jýyrda óńirge jumys sapary kezinde Premer-Ministr Álihan Smaiylov Ekologiia ministrligine kiikke bailanysty maýsymnyń 1-ine deiin naqty sheshimge kelýdi júktedi. Sodan keiin Úkimet qaýlysy ma, ministrlik buiryǵy ma, shyǵatyn bolady. Sebebi, sharýalardyń múddesin qorǵaý kerek. «Bókeiorda» rezervatyna bailanysty aitarym, bul máseleni túbegeili sheshpeidi. Rezervatqa beriletin jer aýmaǵynan uńǵymalar qazyp, zerttegen kezde sý shyqqan joq. Al, sý joq jerge kiik turaqtamaidy. Árine, Úkimet qaýlysyna sáikes rezervat qurylyp, inspektorlar men tehnikalar sany kóbeitiler. Alaida, bul máseleni sheshýge ishinara ǵana septik etedi. Sondyqtan, kári tekelerdi azaityp degendei, kiikter sanyn retteý qajet», - dedi Ǵali Esqaliev.
Qazaqstanda kiikterdi atýǵa 2015 jyldan bastap tyiym salynǵan bolatyn. Keiin bul merzim 2023 jylǵa deiin uzartyldy. Sol kezde kiik sany 10-15 myńdai edi, qazir 500 myńnan asyp ketti. Biylǵy sanaq qorytyndysy boiynsha odan da kóbeiýi múmkin.
