Shardara sý qoimasy tolyq jóndeýden ótkennen keiin 7 baldyq jer silkinisine shydas beretin seismikalyq tózimdilikke ie bolady.
Bul týraly jýrnalisterge arnalǵan press-týr barysynda sý qoimasynda seismikalyq turaqtylyqty nyǵaitý boiynsha jóndeý jumystaryn júrgizip jatqan qurylys kompaniiasynyń ýchaske basshysy Ǵalym Myrzabaev málimdedi.
Onyń aitýynsha, 1967 jyly «Shardara» sý qoimasy eń kóp degende alty baldyq jer silkinisine tótep beretindei qýattylyqpen salynǵan. Alaida, Ekologiia, geologiia jáne tabiǵi resýrstar ministrliginiń Sý resýrstary komitetine qarasty «Qazsýshar» RMK saqtyq sharalaryn kúsheitý úshin qumnan kóterilgen qabyrǵalardy qalyńdatyp, jer asty sýlarynyń deńgeiin tómendetý úshin «Shardara» sý qoimasyn qaita jańǵyrtý jumystaryn qolǵa alǵan.
«1 mln 100 myń tekshe metr qum tóseledi. Osylaisha nysan qabyrǵasynyń artqy jaǵyn tolyǵymen nyǵaitatyn bolamyz. Jer silkinisi bola qalsa, sý astyndaǵy tektonikalyq plitalar oinaýy múmkin. Sonda sýdyń betinde alyp tolqyndar paida bolady. Bul - jumystardyń barlyǵy sonyń aldyn alý sharasy. Arnaiy burǵylanǵan tesikterdiń sanyn kóbeitip jatyrmyz. Ol jer asty sýlarynyń deńgeiin tómendetedi,- deidi Ǵalym Myrzabaev.
Al, Qapshaǵai sý qoimasy «Shardara» sý qoimasy óndiristik bólimshesiniń basshysy Abai Mútálievtiń sózinshe, ótken jyly sý nysanynyń qabyrǵalaryn nyǵaitýǵa respýblikalyq biýdjetten 7 mlrd 733 mln teńge qarajat bólingen. Osylaisha 56 jyl buryn salynǵan sý qoimasyn kezeń-kezeńimen jańǵyrtý jumystary qarqyndy júzege asyrylýda. Sý qoimasynyń qurylysy 2021 jyldyń aiaǵynda tolyǵymen aiaqtalady dep josparlanyp otyr. Qazirgi tańda jańǵyrtý jumystarynyń shamamen 33 protsenti aiaqtalyp, qurylys josparǵa sáikes júrgizilip jatyr.
Osy ýaqytqa deiin Shardara sý qoimasyndaǵy uńǵyma sany 183 bolatyn. Qazir ol 600-ge deiin kóbeitildi.
Aita keteiik, Shardara sý qoimasynyń jalpy syiymdylyǵy - 5 mlrd 200 mln tekshe metr. Qazir sý nysanynda 792 mln tekshe metr sý bar. Osynyń nátijesinde Shardara aýdany men Qyzylorda oblysynyń biraz bóliginde vegitatsiialyq kezeń sátti ótken. Egin-terim naýqany kezinde Shardara aýdany men Qyzylorda oblysyna 7 mlrd tekshe metr sý berilgen.
Aldaǵy ýaqytta «Shardara» sý qoimasyna sandyq tehnologiialardy engizýdi de josparlap otyr. Qurylys jumystary aiaqtalǵannan keiin sý bólý jáne ony esepteý jumystary tolyǵymen avtomattandyrylmaq.
«Bul jerdiń barlyǵyna elektrondy esepteýish quraldary qoiylady. Bógetten shyǵyp jatqan sýlardyń barlyǵy kompiýter arqyly eseptelip otyrady. Ony bizdiń mamandar baqylap otyrady. Al, buryn gidrotehnikterimiz platinanyń barlyǵyn aralap, sýdyń deńgeiin qolmen ólsheitin»,- deidi Shardara sý qoimasy óndiristik bólimshesiniń basshysy Abai Mútáliev.
