Qytaidyń Shanhai qalasynda turǵyndar COVID-ke qarsy shekteýlerge bailanysty úiinde qamalyp otyr, kópshiligi dári-dármek pen azyq-túlik satyp alý úshin syrtqa shyǵa almaidy, dep habarlady Sputnik Qazaqstan.
Jelide jariialanǵan videodan turǵyndardyń karantinge narazylyq bildirip, kópqabatty úilerdiń terezesinen aiǵailap jatqanyn estýge bolady.
Birqatar jergilikti BAQ-tyń habarlaýynsha, adamdar qatań lokdaýnnyń saldarynan syrtqy álemmen bailanysyn úzdi: olarǵa úiden shyǵýǵa tyiym salynǵan, al azyq-túlikti eriktiler jetkizip berýde. Alaida tapsyrystyń kóptigine bailanysty olar úlgere almai jatyr, kóptegen turǵyn tamaqsyz qaldy. Sonymen qatar halyqtyń qajetti dári-dármekti satyp alýǵa múmkindigi joq.
Shekteýler ásirese qart adamdarǵa qiyn soǵyp tur, olar gadjetpen tamaqqa tapsyrys berýdi bilmeidi.
Epidemiiaǵa qarsy mundai qatań sharalar Shanhai turǵyndarynyń narazylyǵyn týdyrdy.
Qytai ótken táýlikte koronavirýstyń taralýy boiynsha antirekordty jańartty. Jeksenbide koronavirýs infektsiiasy 27 595 adamnan anyqtaldy. Olardyń kópshiligi – Shanhai turǵyndary.
24,9 million adam turatyn megapolis biligi koronavirýs infektsiiasynyń qaitadan órshýine bailanysty 28 naýryzdan bastap lokdaýn engizdi.
