Qazaqstan men Qytai arasyndaǵy mádeni-gýmanitarlyq jáne bilim berý salasyndaǵy yntymaqtastyqty odan ári damytý, sondai-aq uly Abaidyń ádebi jáne mýzykalyq murasyn nasihattaý maqsatynda Qazaqstannyń Shanhaidaǵy Bas konsýldyǵy Shanhai kitaphanasymen birlesip Qytaidyń mańyzdy mádeni jáne ekonomikalyq ortalyǵynda alǵashqy «Abai oqýlaryn» ótkizdi. Bul týraly QR SIM baspasóz qyzmeti habarlady.
Ashylý saltanatynda Qazaqstannyń Bas konsýly Rahymjan Rahimov, kitaphana direktory Chen Chao jáne (Beijińnen beinebailanys arqyly) Qytaidyń belgili jazýshysy, Abai shyǵarmalarynyń aýdarmashysy Aqbar Májit quttyqtaý sóz sóiledi.
Abai oqýlarynyń baǵdarlamasyna Qazaqstan, Qytai jáne Resei azamattary birneshe tilde usynǵan Abaidyń tanymal ádebi jáne mýzykalyq shyǵarmalary endi. Qytai tarihshysy jáne saiasattanýshysy Azat Izollauly «Kóńilim qaitty dostan da, dushpannan da» óleńinen úzindi oqydy. Qytai ánshisi Lin Bao men reseilik ánshi Nikolai Shamov «Kózimniń qarasy» jáne «Aittym sálem Qalamqas» ánderin qazaq tilinde oryndady. Qytailyq antropolog-ǵalym Chjan Shan dombyra men sybyzǵyda asqan sheberlikpen óner kórsetti.
Is-shara aiasynda Bas konsýldyq kitaphananyń qoryna Abai shyǵarmalarynyń qytai tilinde jaryq kórgen basylymdaryn tabystady.
Jalpy, alǵashqy Abai oqýlary Qytai turǵyndaryn uly aqyn, oishyl jáne kompozitordyń shyǵarmalarymen jaqynyraq tanystyrýǵa múmkindik berip, qatysqan qonaqtardyń joǵary baǵasyna ie boldy.
Atap aitqanda, Shanhai saiasi ǵylymdar jáne quqyqtaný ýniversiteti janyndaǵy Eýraziia ǵylymi-zertteý institýtynyń direktory Li Sinniń aitýynsha, Abai shyǵarmalarynda tereń maǵyna bar jáne ótken ádebi basqosý onyń óleńderi men ánderimen jandy oryndaýda tanysýǵa tamasha múmkindik berildi.
Shanhai qoǵamdyq ǵylymdar akademiiasynyń Resei men Ortalyq Aziiany zertteý ortalyǵynyń direktory Pan Davei pikirinshe, ótkizilgen is-shara Qazaqstan men Qytai arasynadǵy mádeni-gýmanitarlyq qarym-qatynastardy nyǵaitýǵa oń septigin tigizedi.
Shanhai shet tilder ýniversitetinde Resei, Shyǵys Eýropa jáne Ortalyq Aziia institýty Ortalyq Aziia tilderi fakýltetiniń dekany Ý Aichjýn uiymdastyrýshylarǵa shynaiy rizashylyǵyn bildirip, bolashaqta jańa da birlesken mádeni-bilim berý is-sharalaryn ótkizýdi qoldaýǵa daiyn ekendigin bildirdi.
Birinshi Abai oqýlaryna Shanhai jáne Ninbo qalalary, Chjetszian provintsiiasy halyq úkimetteriniń syrtqy bailanystar basqarmalarynyń, Shanhai shet eldermen dostyq qaýymdastyǵynyń, Shanhai qalasynyń Halyqaralyq saýdaǵa járdemdesý jónindegi komitetiniń, Shanhai qoǵamdyq ǵylymdar akademiiasy, Shanhai halyqaralyq zertteýler akademiiasy, Shanhai saiasi ǵylymdar jáne quqyqtaný ýniversiteti, Shyǵys-Qytai pedagogikalyq ýniversiteti jáne Shanhai shet tilder ýniversiteti siiaqty iri ǵylymi zertteý jáne bilim berý ortalyqtarynyń basshylary men ókilderi qatysty.
