Almaty oblysyndaǵy poiyz ben avtobýs apatynda 33 jastaǵy áiel men onyń eki qyzy zardap shekti, dep habarlaidy "Ult aqparat" «Qazaqstan temir joly» UK» AQ baspasóz qyzmetine silteme jasap.
Zardap shekken áiel «QTJ» UK» AQ qyzmetkeri bolyp shyqty.
«Qazaqstan temir joly» kompaniiasy zardap shekken áieldiń emdelýine, ári qarai ońalýyna jáne materialdyq turǵyda barlyq qajetti kómekti kórsetedi. Ol Almaty eksplýatatsiialyq lokomotiv deposynda esepshi bolyp jumys istegen. Temir jol salasynda 14 jyldyq eńbek ótili bar», - delingen resmi habarlamada.
Kompaniianyń habarlaýynsha, otbasy demalystaǵy týystarynan kele jatqan.
«Poiyz soqtyqqansha barlyq jolaýshylar avtobýstyń artqy esiginen shyǵyp úlgergen. Al Elmira aldynda uiyqtap jatqan eki qyzymen avtobýstan shyǵyp úlgermegen. Qazir olar Qaskeleń qalasyndaǵy Qarasai aýdandyq ortalyq aýrýhanasynda jansaqtaý bóliminde jatyr. Onyń qyzdary jabyq bas súiek-mi jaraqatyn alǵan. Áieldiń miy shaiqalyp, travmatikalyq shok alǵan, oń qoly, buǵanasy men qabyrǵasy synǵan. Áriptesteri Elmira men onyń qyzdarynyń saýyǵyp ketýin tileidi», - dep jazdy baspasóz qyzmeti.
«QTJ» UK» AQ arnaiy komissiiasy oqiǵa ornyna shyqty. Kompaniia basshylyǵy aýrýhana baryp, zardap shekkenderdiń jai-kúiin surady.
Esterińizge sala keteiik, 15 qyrkúiek kúni Shamalǵan stansasynda poiyz ben avtobýs soqtyǵysty. Jolaýshylar avtobýsy relske shyǵyp ketken.
Oqiǵa ornynda avtobýs júrgizýshisi mert bolyp, taǵy 3 adam Qarasai aýdandyq aýrýhanasynyń jansaqtaý bólimine jatqyzyldy. Onyń ekeýi bala.
Qazir atalǵan fakti boiynsha QR QK 345-babynyń 3-tarmaǵy boiynsha is qozǵalyp, tergeý júrip jatyr. Isti Bas kóliktik prokýratýra baqylaýyna aldy.
