17 qyrkúiekte Almaty oblysy Qarasai aýdanyndaǵy Shamalǵan stantsiiasynda jergilikti bilik ókilderi men turǵyndar kezdesip, ótken jeksenbide poiyz ben avtobýs soqtyǵysqan temirjoldyń avtokólik jolymen qiylysatyn tusyna keiin salý jaiyn talqylady.
Jiynda sóilegen Qarasai aýdany ákimi Jandarbek Dalabaev jaqyn ýaqytta kópir salý jergilikti biliktiń josparynda joq ekenin habarlady. Shamalǵandaǵy jiynǵa Almaty oblysy ákiminiń orynbasary Baǵdat Mánizorov qatysty.
Aýdan ákiminiń jaýabyna qanaǵattanbaǵan jergilikti turǵyndar kópir salýdy talap etti. Keibireýleri apat bolǵan temirjol ótkelindegi kólik qozǵalysyn rettemeidi dep jol politsiiasynyń jumysyn synady. Azattyq tilshisiniń habarlaýynsha, jiynǵa jergilikti politsiia men prokýratýra ókilderi de qatysqan.
Shamalǵandaǵy bul jiyn 15 qyrkúiekte keshke temirjol ótkelinde bolǵan apattan keiin ótip jatyr. Jeksenbi kúni keshke temirjol ótkelinde turǵan avtobýsty júrdek poiyz soǵyp ótken. Biliktiń habarlaýynsha, tyiym salatyn belgige qaramastan "temirjol ótkeline shyǵyp ketken" avtobýs júrgizýshisi mert bolyp, avtobýsta otyrǵan úsh jolaýshy (ekeýi - bala) jaraqat alǵan. Poiyz jolaýshylary zardap shekpegen.
Apattan keiin Shamalǵan stantsiiasynyń turǵyndary temirjoldy jaýyp, bilikten poiyz ótetin kópir salýdy talap etken. Olar apat bolǵan temirjol ótkelinen "kúnine júz shaqty poiyz" ótetinin aityp, "jeti jyldan beri kópir salynatyny jaily ýádege toidyrǵan" bilikke narazylyq bildirdi.
Dúisenbide Nur-Sultandaǵy brifingte Qazaqstan indýstriia jáne infraqurylymdy damytý ministri Roman Skliar apat bolǵan temirjol ótkelinde talapqa sai baǵdarsham men shlagbaým bolǵandyqtan, ol jerde kópir salynbaitynyn málimdegen.
