Aqtóbe oblysyndaǵy Shalqar kóliniń tabanyn tazartý jumystary jyl aiaǵyna deiin aiaqtalýy múmkin, dep habarlaidy "Ult aqparat".
Bul týraly Aqtóbe oblysynyń ákimi Ońdasyn Orazalin ortalyq kommýnikatsiialar qyzmetinde ótken baspasóz konferentsiiasynda aitty.
«Shalqar kóliniń problemasy – ońdy sheshimin tapqan másele. 2019 jyly Memleket basshysy Qasym-Jomart Kemeluly kelip, máseleni túbegeili sheshý týraly tapsyrma bergen bolatyn. Osyǵan bailanysty Úkimet qoldaý kórsetip, byltyr jergilikti biýdjet esebinen jobalaý-smetalyq jumystaryn ótkizgenbiz. Biyldan bastap Úkimet tarapynan 3 mlrd teńgedei qarajat bólinip, osy jumysqa kiristik. Kóldiń tabanyn tazartý, onyń sý aidynyn qalpyna keltirý jobasy negizi eki jylǵa josparlanǵan. Biraq biz merdigerge usynys jasap edik, jyl aiaǵyna deiin jumysty bitirýge ýádesin alyp otyrmyz. Keler jyly kóktemde sý tasyǵan ýaqytta biraz sý jinap alamyz degen úmitimiz bar», - dedi oblys ákimi.
Aimaq basshysy óńirdegi basty ekologilyq problemalardń qala sheshilip jatqanyna toqtaldy.
«Ekologiia máselesi Aqtóbe óńirinde bir kúnde emes, biraz ýaqyttan beri qalyptastqan. Qaldyqtar saqtaityn poligonǵa kelsek, 60 gektar kólemi bar, 25 jylǵa josparlanǵan poligon bul. 2007 jyly salynǵan, jobalyq qýaty boiynsha 2032 jyly tolýy kerek edi. Biraq qalanyń ósýi sonshama qarqyndy bolǵandyqtan, qazirdiń ózinde tolyp ketti. Qazirgi tańda jekeshelendirý protsesterine bailanysty burynǵy kommýnaldyq mekemeler joq. Onyń ornyna máseleni túbegeili sheshý úshin merdigerlerdiń aldyna talap qoidyq. Onyń ústine ROP operatordyń kúshimen myńdaǵan qoqys jinaityn quraldar aldyryp jatyrmyz. Poligonnyń qurylysy biyl 1 qazanda aiaqtalady degen jospar bar. Jyl aiaǵyna deiin osy másele sheshiledi», - dedi Ońdasyn Orazalin.
Konferentsiia barysynda óńir basshysy aqtóbelikter qolqany qapqan jaǵymsyz iisten qashan qutylatynyn aitty.
«Iiske keletin bolsaq, kárizderdiń bári ábden tozǵan. Jobalaý jumysyn daiyndap bergenbiz. Ókinishke qarai, qarjylandyrý máselesi tolyq sheshilmegen. Degenmen, himiialyq qosyndylardyń, bakteriialardyń kúshimen sol iisti azaitý sharalaryn qoldanyp júrmiz. Bul másele áli de ózekti ekeni ras. Onyń ústine qalada úlken óndiris oryndary ornalasqandyqtan, olardyń tútini, basqa da aýaǵa shyǵaratyn qaldyqtary bar, sonyń zardabyn shegip kele jatyrmyz. Bul másele Ekologiia, geologiia jáne tabiǵi resýrstar ministrliginiń tikelei baqylaýymen júrgizilip jatyr. Ministr Maǵzum Maratuly birneshe ret ózi kelip, sol mekeme basshylarymen kezdesip, jol kartasyna qol qoiyp, jumys bastalyp ketti. Jańa da aittym, bul bir kúnde paida bolǵan másele emes. Bul jerde altyvalentti hrom siiaqty tarihi qaldyqtar da bar. Tehnologiianyń bárin jańa talaptarǵa sáikestendirý kerek. Ol da - bir kúndik jumys emes. Kásiporyn 2-3 jyl ýaqyt surap otyr. Qazir jumys bastalǵan», - dedi oblys basshysy.
