Aqtóbe oblysynyń ákimi Berdibek Saparbaev Shalqar aýdanyna jumys saparymen shyǵyp, el jaiymen tanysty. Issapar kezinde Shalqar qalasyndaǵy «Bolashaq» baqshasy ashyldy. Al bul balabaqshanyń lentasy osydan 2 jyl buryn qiylyp, kilt tapsyrý rásimi de ótken. Tipti, respýblikalyq, jergilikti BAQ arqyly jańalyq ta berildi. Bnews.kz tilshisi óńir basshysynyń jumys saparyndaǵy birqatar kózboiaýshylyqtar men asyra silteýshi sheneýnikterdiń áreketin áshkere etti.
Aqtóbe oblysynyń ákimi Berdibek Saparbaev Bershúgirdegi qiyrshyq tas óndirý zaýytynyń jańa jelisin ashty. Munda tań qylań bere aǵash úi tigilip, arnaiy sahna daiyndaldy. Al jumysshylar men stsenarii avtorlary birneshe márte daiyndyqtaryn pysyqtap, tipti, oblys ákimi Berdibek Saparbaevtyń obrazyna enip, halyqpen amandasty, qyzyl túiindi basyp, zaýytty iske qosýǵa ruqsat berdi.
Óńir basshysynyń saparyna qýanǵan jumysshylar bolsa birneshe ai boiy 13 myń teńge jalaqy alyp júrgenin, keibiri qysqaryp qalǵanyn jetkizýdiń jolyn izdedi. Alǵashynda eshkim bata almady. Óńir basshysy «suraqtaryńyz bar ma, qazir ketip qalamyn, keiin ókinip júrmeńizder» dep qaita suraǵanda alda turǵan jumysshylar emes, zeinetkerler balalarynyń jumysyndaǵy qiyndyqtar týraly aityp berdi.
«Balalarymyz qiyrshyq tas zaýytynda jumys isteidi. Shynyn aitqanda, 2015 jyldan beri jumysshylar durys jalaqy alǵan emes. Qazir «Tumar», «Temir jol jóndeý» seriktestikteri bolyp ekige bólindi. Jumysshylar qysqaryp jatyr. Meniń balam 13 myń ailyq alady. Onyń bala-shaǵasyn zeinetker – men asyrap otyrmyn»,- deidi zeinetker Roza Abjaparova.
Al Qýanysh Sandyǵul – zaýytta qysqartýǵa tap bolǵan jumysshylardyń biri. Ol zaýyt qurylysyna qatysqan, uzaq jyldar boiy mashinist-konveier bolyp eńbek etken. Kásiporyn basshylary aryz-shaǵymdy tyńdaǵan oblys ákimi Berdibek Saparbaevty aldaǵy ýaqytta mekeme keńeiip, jańa jumys oryndary ashylady dep sendirdi.
Keiin Berdibek Saparbaev Shalqar qalasyna bardy. Bir qyzyǵy, erekshe daiyndalyp, ózgelerden asyp túsýdi maqsat etken shalqarlyqtar 7 birdei aq tústi «Djip» kóligin daiyndap, basshylardy kútip aldy. Al óńir basshysynyń jumys sapary men jańa nysandardyń ashylýyn, halyqtyń jaiy týraly el ishin habardar etetin tilshiler «Jigýli», «ÝAZik» kólikterine minip, júitkigen sheteldik kólikterge ilesýine týraly keldi. Kei nysandarǵa barar jolda adasyp, tanystyrylymǵa keshigip qaldy.
Soraqysy sol – Berdibek Saparbaevty aýdan ákimi Baýyrjan Qaniev pen kásipkerler aldap soǵyp, 2014 jyly lentasy qiylǵan «Bolashaq» balabaqshasyn ekinshi ret ashty. Saltanatty jiynǵa balalar, ata-analar men bilim bóliminiń mamandary qatysty.
Myna sýretter dál osy balabaqshanyń 2 jyl buryn ashylǵanyn aiǵaqtaidy.
«Aýdanda 558 bala baqsha kezeginde tur. Balalardy jappai baqshamen qamtý maqsatynda memlekettik-jeke menshik seriktestik aiasynda bir balabaqshanyń qurylysy bastaldy, al «Bolashaq» baqshasy 190 balaǵa arnalǵan. Balabaqshada 58 adam jumys isteidi», - degen aýdandyq bilim bóliminiń basshysy Rita Basmaǵambetova baqshanyń buryn ashylǵanyn rastamady.
Al jergilikti, respýblikalyq tilshiler osydan eki jyl buryn balabaqshanyń ashylýyna qatysyp, sol jyldary oblys ákimi bolǵan Arhimed Muhambetov «Qazaqstan temir joly» UK qoldaýymen balabaqsha paidalanýǵa berildi» dep aqparat taratqan edi.
