Shahtinskte kóńil kóterý oryndarynyń biriniń mańynda bolǵan tóbeles toqtatylyp, kúdiktiler ustaldy, dep habarlaidy "Ult aqparat" Polisia.kz Telegram-arnasyna silteme jasap.
"22 naýryz saǵat 23:50 shamasynda Shahtinsk politsiia bóliminiń kezekshi bólimine qaladaǵy kóńil kóteretin oryndardyń biriniń mańynda kikiljiń bolyp jatqany týraly habarlama tústi. Oqiǵa ornyna tez arada sol mańǵa jaqyn patrýldik politsiia jasaǵy jiberildi.
Osylaisha, belgisiz adamdardyń qatysýymen tóbeles bolyp jatqany anyqtaldy. Quqyqqa qaishy áreketterdi jáne aýyr zardaptardy boldyrmaý maqsatynda politsiia qyzmetkerleriniń biri aspanǵa eskertý retinde oq atty. Oqiǵaǵa qatysýshylardyń barlyǵy politsiia bólimine jetkizildi", - delingen habarlamada.
Atalǵan derek boiynsha QR QK-niń 293-baby 2-bóligine ("Buzaqylyq") sáikes qylmystyq is qozǵaldy. Tergeý amaldary júrgizilip jatyr.
