Foto ©️ Tengrinews.kz / Turar Qazanǵapov
Qaraǵandy oblysynyń ákimi Ermaǵanbet Bólekpaev jýrnalistermen kezdesip, "ArselorMittal Temirtaý" kompaniiasynyń shahtalaryndaǵy jaǵdai jáne qaza tapqan kenshilerdiń otbasylaryna kórsetilgen materialdyq kómek týraly aityp berdi, dep habarlaidy "Ult aqparat" óńir ákimdiginiń baspasóz qyzmetine silteme jasap.
Aimaq basshysynyń aitýynsha, búgingi tańda kompaniianyń tórt shahtasy tolyq jumys istep jatyr. "Qazaqstanda" órt saldaryn joiý jalǵasýda, Kostenko atyndaǵy shahtada apatty tergeý júrip jatyr.
"Mamandardyń baǵalaýy boiynsha Kostenkodaǵy jumysty tolyq qalpyna keltirý úshin taǵy 2–2,5 ai qajet bolady. Shahtalardy jabý týraly áńgime bolǵan joq. Olar jumys isteidi", – dep sendirdi Bólekpaev.
Sondai-aq ol kenshiler men metallýrgterdiń jalaqysyn tómendetýge qatysty ózgerister men qysqartýlar bolmaitynyn jetkizdi.
"Ujymdyq shartqa sáikes barlyq mindetteme oryndalatyn bolady. Qaza tapqan kenshilerdiń otbasylary barlyq qajetti kómekti alady", - dep tolyqtyrdy ákim.
Onyń sózinshe, búgingi tańda 46 otbasy BJZQ-dan jerleýge birjolǵy tólem qujattaryn resimdegen, 42-si tólenip, qalǵandary tólemdi alyp jatyr. Sonymen qatar respýblikalyq biýdjetten 23 jasqa deiingi JOO-da oqityn kámeletke tolmaǵan balalary bar 20 otbasyna asyraýshysynan airylý jaǵdaiy boiynsha memlekettik áleýmettik járdemaqy taǵaiyndalǵan.
Foto: Qaraǵandy oblysy ákimdiginiń baspasóz qyzmeti
"ArselorMittal Temirtaý" kompaniiasy tarapynan 41 otbasyǵa 10 jyldyq jalaqy tólendi. Qaza tapqan kenshilerdiń, olardyń jubailarynyń, ata-analarynyń, balalarynyń nesieleri óteldi.
Sondai-aq, kompaniia árbir otbasy múshesine keminde 18 sharshy metr paidaly alań esebi boiynsha páter satyp alýǵa mindettenedi. Saqtandyrý tólemderi, joǵary oqý oryndaryndaǵy balalardyń 23 jasqa deiin oqý aqysyn óteý qarasha aiynan bastap túse bastaidy", – dep atap ótti óńir basshysy.
Oblys ákimi "ArselorMittal Temirtaý" qaza tapqandardyń otbasylary aldyndaǵy barlyq mindettemeni oryndaitynyn atap ótti.
Meditsinalyq mekemelerde áli de zardap shekken 10 kenshi jatyr. Olar dárigerlerdiń baqylaýynda, jaǵdailary ortasha jáne jeńil deńgeide dep baǵalanady.
Esterińizge sala keteiik, 28 qazanǵa qaraǵan túni Qaraǵandy oblysyndaǵy Kostenko atyndaǵy shahtada metan jarylyp, saldarynan 46 kenshi kóz jumdy. Apat faktisi boiynsha qylmystyq is qozǵaldy. Premer-ministrdiń tóraǵalyǵymen úkimettik komissiia quryldy.
29 qazan elimizde Jalpyulttyq aza tutý kúni dep jariialandy.
Osy apattan keiin Prezident "ArselorMittalmen" investitsiialyq yntymaqtastyqty toqtatýdy tapsyrdy. Úkimet kompaniiany Qazaqstan paidasyna berý týraly aldyn ala ýaǵdalastyqqa qol jetkizilgenin málimdedi.
