Shaǵyn jáne orta bizneste ahýal qandai bolsa, halyqtyń jaǵdaiy sondai. Bul týraly Úkimettiń keńeitilgen otyrysynda Memleket basshysy Qasym-Jomart Toqaev aitty, dep habarlaidy "Ult aqparat".
«Basty maqsatymyz - koronavirýs pandemiiasy men onyń saldaryn joiý. Buǵan deiin sóz alǵandar jumystaǵy oń nátijeler týraly aitty. Sondyqtan bergen negizgi mindetterge jáne jiberilgen qatelikterdi túzetý úshin atqarylatyn jumystarǵa toqtalamyn. Birinshi - ekonomikalyq belsendilikti qoldaý. Pandemiia men karantin shekteýleri, saýda qatynastarynyń buzylýy eldegi iskerlik belsendilikke keri áserin tigizdi. Kóptegen iri kásiporyndardyń kórsetkishi tómendedi. Ásirese shaǵyn jáne orta biznes qatty zardap shegýde»,- dedi Memleket basshysy.
QR Prezidenti byltyr daǵdarysqa qarsy birqatar shara qabyldanǵanyn aitty.
«Onyń aýqymy asa zor bolǵany jáne júieli júzege asyrylǵany barshańyzǵa belgili. Biznestiń suranysyna ie bolyp otyrǵan mańyzdy sharalar osy jyldyń sońyna deiin uzartyldy. Shaǵyn jáne orta biznes halyqtyń úshten birine jumys taýyp berip otyr. Bir sózben aitqanda, onyń ahýaly qandai bolsa, halyqtyń da jaǵdaiy sondai. Biyl shaǵyn jáne orta bizneske qoldaý kórsetý eń basty nazarda bolýy tiis. Úkimetke «Atameken» ÚKP-men birlesip, 1 aidyń ishinde osyǵan qajetti is-sharalar toptamasyn ázirleýdi tapsyramyn», - dedi Memleket basshysy.
