Búgin Astanadaǵy №2 Esil aýdandyq sotynda Seiitqazy jáne Áset Mataevtardyń qylmystyq isi boiynsha basty sot otyrysy bastaldy. Buǵan deiin habarlanǵandai, bul sot ashyq jaǵdaida ótip jatyr. Protsesten habar taratýǵa kelgen jýrnalister sot zalynan tikelei transliatsiia jasalyp otyrǵan arnaiy jabdyqtalǵan baspasóz zalynda jumys isteýde.
Sotqa jaýap berýge kelgender jáne olardyń qorǵaýshylary sotqa eshqandai ótinish haty joqtyǵyn málimdedi. Odan keiin sóz kezegi memlekettik aiyptaýshyǵa berildi. Onyń sózinen málim bolǵanyndai, 2010-2015 jyldar aralyǵynda Seitqazy jáne Áset Mataevtar óziniń qyzmettik babyn paidalana otyryp, aldaý jáne senimge qiianat etý jolymen memlekettik satyp alý salasynda jalpy somasy 169 mln. teńgeni quraityn iri kólemdegi qarajatty qymqyrǵan. Bul qarajat memlekettiń aqparattyq saiasatyn nasihattaýǵa bólingen. Alaida saiyp kelgende ol Mataevtardyń qaltasyn qampaitypty.
Buǵan qosa, Seiitqazy Mataev óziniń jeke basynyń bedelin paidalana otyryp, «Qazaqtelekom» AQ-nyń 143 mln. teńgege jýyq aqshasyn urlaǵan. Mundai somany kompaniianyń esebine óndirip alý jóninde zardap shekken taraptyń ókilderi málimdedi. Atap aitarlyǵy, kompaniia ókilderi biraýyzdan málimdegendei, S. Mataev tenderdi zańsyz utyp alyp otyrǵan, al atqarylǵan jumystardyń aktisin eshkim teksermegen.
Sonymen qosa, S. Mataev 200 mln. teńgeden astam salyqty tóleýden jaltarǵan kórinedi. Búginge deiin ol kórsetilgen somanyń shamamen 47. mln. teńgesin memleketke tólep qaitardy.
Ámirlan Álimjan
