Foto:twitter.com/MySamudera
Ońtústik Koreia biligi Helloýin merekesi kezinde bolǵan oqiǵaǵa qatysty tergeýdi bastady, - dep habarlaidy Tengrinews.kz agenttigi Daily Mail basylymyna silteme jasap.
Ońtústik Koreianyń premer-ministri Han Dak Sý 31 qazanda el tarihyndaǵy eń aýyr apattardyń biri - Seýlde 150-den asa adamnyń ómirin qiǵan Helloýindegi oqiǵany muqiiat tekserýge ýáde berdi. Ońtústik Koreiada aza tutý aptasy bastaldy.
Resmi ókilderdiń aitýynsha, bir túnde qaza tapqandar sany 154-ke jetken, 149-y jaralanyp, 33-i aýyr jaǵdaida. Qaza tapqandar arasynda keminde jiyrma eldiń azamattary bar.
"Úkimet bul qaiǵyly oqiǵanyń sebepterin muqiiat tekseredi jáne mundai jaǵdai qaitalanbaýy úshin qajetti institýtsional ózgeristerdi engizý úshin qoldan kelgenniń bárin jasaidy. Biz qaza tapqandardyń otbasy pikirine qulaq asyp, qajetti qoldaý kórsetýge bar kúshimizdi salamyz", - dedi premer-ministr Han Dak Sý.
Ulttyq aza tutý merzimin jariialap, Ithevondy apat aimaǵy dep jariialaǵan prezident Iýn Sok El dúisenbi kúni Seýl qalalyq ákimshiligi janyndaǵy memorialdyq altarǵa baryp, qurbandarǵa taǵzym etti.
Eske salaiyq, myńdaǵan adam senbi, 29 qazanda Seýldiń áigili Ithevon aýdanyna keiingi úsh jyldaǵy alǵashqy Helloýin merekesin toilaýǵa jinaldy. Adamdar jinalǵanda haos bastalyp, esterinen tana bastaǵan.
Seýl qalasynyń jedel shtaby men politsiiasy málimetinshe, Ithevon aimaǵyndaǵy qaiǵyly oqiǵadan zardap shekkenderdiń arasynda Qazaqstan azamaty da bar.
