Seýlde Helloýin merekesin toilaý kezinde qaza tapqan qazaqstandyq stýdenttiń ápkesi qaiǵyly oqiǵa týraly aitty, - dep habarlaidy Massaget.kz.
Marqumnyń anasy qyzynyń habarlaspai jatqanyna birinshi bolyp alańdaǵan. Alaida Mádinanyń úlken ápkesi Damira áli úide demalyp jatqanyn aityp, ony jubatqan. Týystary mundai jaǵdai bolady dep múlde oilamaǵan.
"Men Mádinanyń meniń habarlamalaryma jaýap beretinine nemese maǵan qaita qońyraý shalatynyna senimdi boldym. Men BAQ-ta Koreiadaǵy bolǵan jaǵdaidy kórdim, biraq olarǵa mán bermedim. Bul bizge jáne bizdiń otbasymyzǵa qatysty emes ekenine senimdi boldym. Alǵashynda qaza bolǵandar arasynda qazaqtar bolǵany týraly eshqandai málimet bolmady. Biraq biraz ýaqyttan keiin úiime ákem keldi. Muny ákeme Qazaqstannyń konsýly habarlaǵan. Biz osylai bildik...", - deidi Damira.
Týystary bolǵan jaǵdaidy birden qabyldai almaǵan. Qaza bolǵan stýdenttiń ápkesiniń aitýynsha, Qazaqstannyń Koreiadaǵy konsýldyǵy otbasyna úlken kómek kórsetip jatyr. Ókildik qyzmetkerleri barlyq qujattamany, sondai-aq, máiitti eline jetkizýdi óz qolyna aldy.
"Qazaqstannyń Koreiadaǵy konsýldyǵy bizge kóp kómektesedi... Olar bizben únemi bailanysta, kóp kómektesedi. Kúte turýymyzdy suraidy, máiit áli Koreiada, óitkeni onda biýrokratiia. Sondyqtan, konsýldyqpen alǵash ret habarlasqanymyzda birden alańdamaýdy jáne barlyǵyn sheshetinderin aitty", - deidi Damira.
Onyń aitýynsha, sińlisi Koreiany qatty jaqsy kóretin. Biyl jazda Mádina Qazaqstandaǵy týystaryna qonaqqa kelip, Jańa jyldy qarsy alý úshin qaityp oralýǵa ýáde bergen.
Ápkesi usynǵan sýret
"Men ákemnen konsýldyqtan habarlasqanyn estigende, onyń zardap shekkenderdiń arasynda jáne aýrýhanada jatyr dep oiladym. Biraq olai emes eken. Otbasyndaǵy kenjemiz... Bizdiń súiikti qyzymyz. Ol dúniege kelgende men alty jasta edim. Sińlim qolymda ósti. Men oǵan júrýdi úirettim. Aǵylshyn tili men mýzykadan sabaq beretinmin. Aqtóbede mýzyka mektebin, fortepiano kýrsyn bitirdi, bas gitarada oinaýdy úirendi. Ol úzdik stýdent edi. Ol bizdiń maqtanyshymyz edi", - deidi Damira.
2015 jyly qyz tájiribe almasý boiynsha alǵash ret Koreiaǵa barǵan. Al 2017 jyly ol Chýnan ýniversitetiniń magistratýrasyna oqýǵa túsken.
"Onyń sol elge degen mahabbaty mýltfilmderden bastaldy... Mádina Koreiany qatty jaqsy kóretin, ol jaqta oǵan unaityn. Óziniń bolashaǵyn sonda kóretin. Bulai bolar dep eshkim oilaǵan joq", - deidi Damira.
Qyzdyń jeke zattary Koreiada qalǵan. Damiranyń aitýynsha, jaqynda ǵana sińlisi ózine jańa jihaz satyp alǵan. Marqumnyń jan dosy Mádina ýniversitettegi dostarymen birge otbasyna qarjylai kómek kórsetý maqsatynda qaiyrymdylyq aktsiiasyn uiymdastyrdy. Damiranyń aitýynsha, bul týraly jastardan eshkim suramaǵanymen, Mádinany biletinderdiń bári beijai qalmaǵan.
Aita keteiik, Seýl qalasynyń jedel shtaby men politsiiasynyń málimetinshe, Itevon aýdanyndaǵy qaiǵyly oqiǵa saldarynan qaza tapqandar arasynda Qazaqstan Respýblikasynyń 1996 jyly týǵan azamaty bolǵan. Ol - Aqtóbe oblysynyń týmasy. Qazaqstan azamaty Koreia Respýblikasynda joǵary oqý oryndarynyń biriniń stýdenti bolǵan.
Eske salaiyq, buǵan deiin Seýlde Helloýindi toilaý kezinde 155 adam qaitys bolyp, 82 adam jaralanǵany habarlanǵan bolatyn.
