Foto Facebook jelisinen alyndy
Jýyrda aitysker aqyn Serikzat Dúisenǵazynyń jalǵyz uly Býrabaiǵa jaqyn jerdegi shańǵy bazasynda jumbaq jaǵdaida kóz jumǵan. Aýyr qaiǵydan esin endi jinaǵan áke balasynyń ólimine qatysty shyndyqty aityp, jelide jazba jariialady, dep habarlaidy "Ult aqparat".
"Assalaýmaǵaleikým, aǵaiyn! Kútpegen oqys jaǵdaidan esti endi ǵana jiyp otyrǵan jaiym bar. Mundai aýyr synaqty Alla eshkimniń basyna bermesin. Qaiǵyrǵanǵa basý aityp, qamyqqanǵa aqyl aityp júrgen adam bolsam da, júrekke jazylmas syzat tústi. Endi onyń emi tek Allanyń týra joly, Islamnyń iman bailyǵy ǵana bolar. Taǵdyrǵa iman keltirgen musylmanbyz ǵoi. Bergenine shúkirlik qylǵan Allaǵa alǵanyna kúpirlik qylmaimyz.
Aldymen osy eń qiyn sátimde qulynshaǵymnyń qaiǵysyn bólisken barsha qazaq halqyna perzenttik hám ákelik alǵysymdy aitamyn. Tóbesine kótergen qara orman halqym bolmasa eshkim emes ekenimdi bilemin. Alla jazsa, endi qalǵan ǵumyrymda qazaǵymnyń keleshegi úshin qyzmet etip ótermin.
Men - Prezident Qasym-Jomart Kemelulymen kezdesip sóilesken adam emespin. Basyma qaiǵy túskende ony Memleket basshysynyń bóliskenin azamattyq dep sanaimyn. Áli ómirdiń úlken esigin ashyp úlgermegen perishte balam úshin menimen birge qaiǵyryp, kóńil aitý hattaryn joldaǵan Prezident apparatyna, Úkimet múshelerine, depýttattarǵa, oblys ákimderine, rektorlarǵa, aqparat quraldarynyń basshylaryna, Bas múfti bastaǵan din qyzmetkerlerine rahmetimdi aitamyn. Tilek-nietterińiz Qudaidan qaitsyn!" - dep jazdy ol.
Aqyn jalǵyz uly bolǵan soń marqum Álihannyń boiyna er azamatqa tán barlyq qasietterdi sińirip ósirýge tyrysqanyn aitty.
"Ózim qandai da bir jaqsy ortaǵa barsam, ertip aparyp, kórsetip júretinmin. Ekeýmiz qolymyz bos ýaqytta atqa minip, balyq aýlaitynbyz. Jazdy kúnderi taýǵa shyǵyp, kólge shomylsaq, qysty kúnderi konki men shańǵy tebetinbiz. Kishkentai kúninen qalaǵan kitaptaryn satyp áperip bilimdi bolýǵa tárbieledik. Qazaqtyń halyq ertegilerinen, balalar ádebietiniń ozyq úlgilerinen, tanymdyq entsiklopediialardan óziniń jeke kitaphanasyn jasaqtadyq. Qurannyń álippesin tanytý úshin eki jyl «Áziret Sultan» meshitiniń jazǵy imandylyq kýrstarynda oqyttym. Nátijesi jaman bolǵan joq. Jetinshi synypqa deiin №48 mektep-litseide bilim aldy. Jetinshi synypta №9 «Zerde» daryndy balalar mektebine qabyldandy. Sol mekteptiń myqty ustazdarynyń arqasynda boiyndaǵy ǵalymdyq qabileti ashyldy. Fizika, informatika, robototehnika salalary boiynsha ótken qalalyq, respýblikalyq, halyqaralyq olimpiadalar men ǵylymi jobalardyń jiyrmadan asa saiysynda olja saldy. Joǵary matematika men fizikany jaqsy meńgerdi. Tipti, onyń jasaǵan ónertapqyshtyq jobalaryn ótken jazda «Qazaqstan» ulttyq arnasy túsirip, efirden kórsetkenin endi ǵana bilip otyrmyn. Maǵan ol týraly ózi aitqan joq. Maqtanǵandy unatpaityn. Armany Nikola Tesla siiaqty injener-ónertapqysh ǵalym bolý edi. Aldaǵy aqpan aiynda jiyrma úsh memleket qatysatyn halyqaralyq «Jáýtikov» olimpiadasynyń oqý-jattyǵý daiyndyǵynan tolyq ótken-tuǵyn. Endi medal ákeledi dep kútip júrgende osyndai jaǵdaiǵa dýshar boldyq" - deidi qaiǵyǵa dýshar bolǵan shaiyr.
Serikzat Maqsutulynyń jazýynsha, ol Álihannyń táp-táýir aqyn bolǵanyn da ustazdary jibergen óleńderinen tanyǵan.
"Burynyraqta balań óleńder jazyp júrgenin biletinmin. Óleńdi qazaqsha da, oryssha da jazatyn. Ásirese, orys tili muǵalimi jibergen keiingi óleńderinen qalyptasqan aqynnyń qoltańbasyn kórip ań-tań bolyp otyrmyn. Ol óleńderdi keiinirek osy jelige salamyn.
Balamyz shańǵydan oqys jaǵdaida opat boldy desek te keibir tustary bizge áli kúńgirtteý bolyp tur. Ol shańǵyny óte jaqsy tebetin. Aǵashqa qandai jaǵdaida soǵylǵany beimálim. Sol sońǵy ret taýǵa kóterilip bara jatqanyn anasy túsirgen video bar. Ary qarai ne bolǵanyn biz bilmeimiz. «Elikti» shańǵy bazasynyń qyzmetkerleri bir jarym saǵattai qulaǵan balany taýdan tómenge túsirmei, alǵashqy meditsinalyq kómek kórsetpei tyǵyp ustaǵany kókeige kúdik uialatady. Sondyqtan oqiǵa bolǵan sátti kórgen kýágerlerdi izdep jatqanymyz ras. Iá, balamyz endi qaityp oralmas. Biraq basqa adamdar da bizdiń kúiimizdi keshpese eken dep alańdaimyz. Sebebi, shańǵy bazasynda eshqandai tehnikalyq qaýipsizdik saqtalmaǵan. Myńdaǵan adam syrǵanap jatqan jerde alǵashqy kómek kórsetetin dárigerleri de joq. Ol bylai tursyn, balasyn joǵaltyp shyryldaǵan ata-anaǵa eshkim jaýap bermei, bir-birine siltegenin qalai túsinemiz? Sol «Elikti» eshteńe bolmaǵandai áli jumys istep turǵan kórinedi. Bizdiń elde adamnyń quny joq ekeni, eshkim eshteńege jaýapty emes ekeni osydan-aq bilinbei me? Sondyqtan bizdiń memlekettik organdar osyndai demalys oryndarynyń tehnikalyq qaýipsizdigin tekserý kerek dep sanaimyn. Ony buqaralyq aqparat quraldary túsirip, halyqqa jariialaý kerek. Onsyz da at tóbelindei az qazaqpyz. Qyryp tastai beretin artyq adam joq bizde! Alla Taǵala qara orman qazaǵymdy aman qylsyn! Kishkentai Álihanymnyń jetpegen uly armanyna jetetin urpaq kóp bolýyn tileimin!" - dep sózin aiaqtady aqyn.
