Ulttyq geologiia qyzmetin qurý jónindegi uiymdastyrý sharalary 1 shildege deiin aiaqtalýy kerek. Bul týraly QR Ekologiia, geologiia jáne tabiǵi resýrstar ministri Serikqali Brekeshev aitty, dep habarlaidy QazAqparat.
«Ekologiia, geologiia jáne tabiǵi resýrstar ministrliginiń aldynda turǵan ekologiialyq barlaý salasyndaǵy mańyzdy mindetterdiń biri - eldiń mineraldy-shikizat bazasyn tolyqtyrý. Osyǵan bailanysty Geologiia komitetimen birlesip, «Qazgeologiia» AQ-yna tapsyramyn. Birinshiden, osy jyldyń 1 shildesine deiin memlekettik jer qoinaýyn basqarý baǵdarlamasyna engizý arqyly jer qoinaýyn paidalaný quqyǵyn berý úshin qoljetimdi aýmaqtyń ashylýy qamtamasyz etilsin. Ekinshiden, Ulttyq geologiia qyzmetin qurý jónindegi uiymdastyrý is-sharalary 1 shildege deiin aiaqtalsyn», - dedi Serikqali Brekeshev ministrliktiń alqa otyrysynda.
Sonymen qatar ol osy jyldyń 1 mamyryna deiin Tsifrlyq damý, innovatsiia jáne aeroǵarysh ónerkásibi, Indýstriia jáne infraqurylymdyq damý ministrlikterimen birge «Qazjer» biryńǵai platformasynda QR mineraldy resýrstar ulttyq derekter banki aqparattyq júiesiniń mindetteri men qyzmetterin iske asyrýdy pysyqtaýdy tapsyrdy.
«Memleket basshysynyń batys óńirlerdi damytý jónindegi tapsyrmalaryn iske asyrý maqsatynda 1 sáýirge deiin Qarjy ministrligimen Aral munai-gaz basseininiń seismikasy boiynsha jumys júrgizýge qosymsha qarjylandyrý máselesi pysyqtalsyn», - dedi ministr.
