Búgin Úkimet otyrysynda Básekelestikti qorǵaý jáne damytý agenttiginiń tóraǵasy Serik Jumanǵarin qurylys materialdarynyń quny ne sebepti óskenin túsindirdi, dep habarlaidy QazAqparat.
«Jyl basynan beri otandyq qurylys materialdary baǵasynyń ósýi 25 paiyzdy qurady. Qurylys materialdary baǵasynyń negizgi ósýi syrtqy naryqtardaǵy baǵa jaǵdaiymen negizdelgen. Bul ózgerister armatýra (ósim 45%), kabel (20%), proflist (70%), shyny (35%) jáne basqa da materialdar qunyna áser etti», - dedi S. Jumanǵarin.
Onyń aitýynsha, baǵanyń ósýiniń negizinde elektr energiiasyna tarifterdiń ortasha - 12%-ǵa, janar-jaǵarmai - 15%-ǵa, energetikalyq kómirge -10%-ǵa, temirjol tasymaldaryna - 18%-ǵa ósýi siiaqty obektivti faktorlar bar. Olar otandyq óndiristiń qurylys materialdary baǵasynyń ósýine tikelei áser etti. Qurylys materialdarynyń ózindik qunyndaǵy osy shyǵyndardyń úlesi 15-ten 30% - ǵa deiin quraidy.
«Baǵany kóterýdiń negizdiligin qaraý jáne sóz bailasý belgilerin belgileý maqsatynda qurylys materialdarynyń 25 túri (kirpish, beton, armatýra, tsement jáne t.b.) boiynsha qurylys materialdary naryqtaryndaǵy básekelestiktiń jai-kúiine taldaý júrgizilip jatyr. Talaptardy buzý belgilerin joiý jáne baǵany tómendetý qajettiligi týraly 75 habarlama joldandy. Búgingi tańda 42 kompaniia habarlamany oryndady. Onyń ishinde 35 kompaniia baǵany tómendetti: armatýraǵa – 25%, tsementke – 10%, betonǵa – 10%, polietilendi qubyrlarǵa – 6%, kabelge – 5-ten 14% - ǵa deiin, kirpishke - 3%. Sonymen qatar bul baǵytta 10 tergep-tekserý jumystary júrgizilip jatyr», - dedi agenttik basshysy.
Onyń sózine qaraǵanda, monopoliiaǵa qarsy baqylaý sharalarynyń nátijesinde respýblika boiynsha baǵa ósýiniń ai saiynǵy trendi maýsym aiyndaǵy 4,2 paiyzdan shilde aiynda 1,7 paiyzǵa deiin tómendetildi.
