Bul týraly ADAL saiasi partiiasynyń sailaýaldy baǵdarlama jobasynyń negizgi baǵyttary VII sezinde aityldy, dep habarlaidy Baq.kz saity.
Nur-Sultan qalasynda ótken ADAL saiasi partiiasynyń VII sezinde sailaýaldy baǵdarlama jobasynyń 5 negizgi baǵyty usynyldy:
• Barlyq azamat úshin laiyqty ómir;
• Kásipkerlik - tabysty memlekettiń negizi;
• AÓK damytý jáne azyq-túlik qaýipsizdigi;
• Qýatty óńirler - qýatty el;
• Memleket adamdar úshin.
Partiia tóraǵasy Serik Sultanǵali VII sezdiń negizgi maqsaty – baǵdarlamany aiqyndap, daiyndyqty pysyqtaý, partiialyq tizimderdi bekitý ekenin jetkizdi.
El damýyna bizdiń partiia da úles qosyp keledi. Partiianyń maqsaty – halyqtyń turmys-tirshiligin, ómir saltyn jaqsartý. Ol úshin úkimet, ministrlikter, ákimdikter, partiialar birige kúsh jumsaýymyz kerek. 2020 jyldyń 10 qańtarynda ótetin Parlamenttik sailaýǵa qatysýǵa bizdiń partiia da daiyndyǵyn jasap jatyr. Búgingi VII sezdiń negizgi maqsaty – baǵdarlamany aiqyndap, daiyndyqty pysyqtaý, partiialyq tizimderdi bekitý. Sezge 347 delegat qatysyp otyr, - dedi ol.
Serik Sultanǵali partiianyń jańarý protsesi tek ataýdyń ózgerýimen ǵana shektelip qalmaitynyn aitty. Eske salaiyq, elimizde 2013 jyly qurylǵan «Birlik» saiasi partiiasynyń ataýy biyl 5 qarashada ADAL bolyp ózgergen bolatyn.
Bizdiń partiia jańardy. Jańarý protsesine bizdiń saiasi keńes pen óńirlik filialdardyń basshylary qozǵaýshy kúsh bolyp otyr. Alǵa jyljý úshin zamanǵa sai aqparattyq tehnologiialardy, taǵy basqa tásilderdi meńgerý kerek. Bizdiń jańarý protsesimiz tek ataýdyń ózgerýimen ǵana shektelip qalmaidy, - dedi partiia basshysy.
